Alash áskeri týraly eki kitapty JOO oqý baǵdarlamasyna engizý usynyldy
Astanadaǵy Ulttyq akademııalyq kitaphanada búgin «Alashordanyń áskerı qurylymy» kitabyn tanystyrǵan Berik Ábdiǵalı «Alash áskeri: Tarıhtan taǵylym» taqyrybynda dáris oqydy. Tyń týyndylar týraly oılarymen bólisken halyq qalaýlylary men professorlar birneshe usynysyn aıtty.
«Bul týyndy óte oryndy boldy. Shynynda da, Alash týraly kitaptar men derekter kóptep shyǵyp jatty. Biraq, Alash taqyrybyna kelgende áskerı qurylymdy týyndyny burynnan beri ańsap júr edik. Bul úlken jumys. Bizdi kezinde Reseıdegi «Belyı fond» arhıvine jibermeıtin. Birinshi kandıdattyq eńbegimniń taqyryby «Natsıonalnyı vopros Sovetskoı armıı v stranah SNG» bolǵan. Sonda 1987-1988 jyly Máskeýdegi arhıvterde jumys istegende taqyrybymdy kórgender «Sen, polkovnık, ne istep júrsiń? Eger osy jumysty ary qaraı jalǵastyra berseńiz, biz sizdi jumystan shyǵaramyz» degen. Sondaı da kezeń ótti. Bizge aqıqat kerek boldy. Táýelsizdiktiń arqasynda shyndyqty taptyq», - deıdi májilismen, general- leıtenant Abaı Tasbolatov.
Májilismen óz sózinde «Alashordanyń áskerı qurylymy» kitabyn birneshe ret oqyp, tań qalǵanyn jasyrmady.
«Ata-babalarymyzdyń qanshasy el taǵdyry úshin ómirden ótti. Men myna kitapty birneshe ret oqyp shyqtym. Shynynda da, mundaı derekter buryn bolmaǵan. Sarbazdardyń tegine deıin jazylǵan. Jumyldyrý jospary týraly kitapta qanshalyqty keremet derekter bar. Jastarǵa bul týyndyny jetkizý kerek. Qarýly Kúshterimizdiń ofıtserlerine osy týyndyny kórsetý kerek. Búkilqazaq sezinde armııany qalaı qurý kerektigi týraly búge-shúgesine deıin talqylanǵan. Áskerdi, atty qaıdan alý kerektigi, qabyldaý komıssııasynyń jumysynyń tártibi, tipti kerek deseń medıtsınalyq tekserýden ótýge deıin jazýly tur. Sol kezdegi Alash áskeriniń erejesinde «bir otbasydaǵy jalǵyz uldyń» áskerden bosatylatyny jazylǵan», - deıdi májilismen.
General-leıtenant keńestik kezeńde qazaqtan ofıtserler az bolǵanyn, Táýelsizdik alǵannan keıin ǵana kadrlar kóptep daıyndalǵanyn aıtty. Abaı Tasbolatov sonymen birge Berik Ábdiǵalıdiń kitabynyń 500 tırajben shyqqanyn estip, týyndyny kóbirek shyǵarý kerektigin aıtty.
Májilis depýtatynyń bastamasyn professor Jáken Taımaǵambetov ta qoldap áketti.
«Bizdiń kezimizde Qazaqstan tarıhy tek 1916 jyldan bastalatyn. Amangeldi Imanovtyń kóterilisinen ary eshteńe bilmeıtin edik. Osyǵan deıin de Berik Ábdiǵalıdiń «Voısko Alash» degen kitaby shyqty. Osy eki kitapty jeke arnaıy kýrs retinde JOO-larǵa engizý kerek. Ásirese, áskerı kafedrasy bar joǵary oqý oryndaryna engizgen abzal», - dep usynysyn bildirdi Jáken Taımaǵambetov.
