Alash arystarynyń taǵdyry jaıly kitap jaryq kórdi

ASTANA. QazAqparat - L.N.Gýmılev atyndaǵy Eýrazııa ulttyq ýnıversıtetiniń prorektory, belgili alashtanýshy ǵalym, QR UǴA korrespondent-múshesi, fılologııa ǵylymdarynyń doktory, professor Dıhan Qamzabekulynyń «Alash - temirqazyq» atty jańa kitaby shyqty. EUÝ baspasynan jaryq kórgen bul jınaqqa ǵalymnyń ár jyldarda bergen suhbattary toptastyrylǵan.

D.Qamzabekulynyń bul suhbattary bir ǵana taqyrypqa - ózi jerine jetkize zerttegen Alashtaný máselelerine arnalǵan. Alash arystarynyń ómir joly, sońynda qaldyrǵan mol murasy, olardyń muraǵattardan tabylǵan belgisiz qujattary, urpaqtarynyń búgingi taǵdyry jóninde qyzyqty málimetter molynan qamtylǵan. Sondaı-aq, bul áńgimelerden tanymal ǵalymnyń azamattyq pozıtsııasy, ózindik ustanymy anyq ańǵarylady. Onyń tııanaqty tujyrymdary táýelsizdik rýhy, el muraty, ult tanymy haqyndaǵy baılam-baıyptamalarmen ádiptelgen.

Osy ýaqytqa deıin D.Qamzabekulynyń «Smaǵul Sádýaqasuly», «Rýhanııat», «Alash jáne ádebıet», «Aǵartýshylyq jáne ádebıet», «Paıym», «Alashtyń rýhanı tuǵyry», «Túrkistan alqasy» atty kitaptary jaryq kórgen. Endi solardyń qatary «Alash - temirqazyq» atty taǵy bir qundy qazynamen tolyqty.