Alash arystarynyń ómiri qatygezdikpen qıylsa da, olardyń rýhy óshpedi - Gúlshara Ábdiqalyqova

QYZYLORDA. QazAqparat - Qyzylordadaǵy saıası qýǵyn-súrgin jáne asharshylyq qurbandaryna arnalǵan memorıaldy keshende "Azaly tarıhqa taǵzym" atty mıtıng ótti, dep habarlaıdy QazAqparat.

Jıynǵa QR Memleketik hatshysy Gúlshara Ábdiqalyqova qatysyp, Alash ardaqtylarynyń esimi el jadynda máńgi saqtalatynyn aıtty.

«Qıyn zamanda Qıyr Shyǵystan, Edil boıynan, Soltústik Kavkazdan kúshtep jer aýdarylǵan túrli ult ókilderi elimizge qonystandy. Qazaq halqy ózderi qýǵyn-súrginge ushyrap otyrǵanyna qaramastan taýqymet tartqan barsha ulysty baýyryna basty, qamqorlyq kórsetti. Sonyń ishinde Syr óńiriniń jurtshylyǵy syrttan kelgen aǵaıynǵa qushaǵyn aıqara ashyp, qıyn kezeńderde pana boldy. Sol almaǵaıyp zamanda qalyptasqan ózara tatýlyq pen týystyq qatynastar búgingi kúnge deıin barynsha nyǵaıyp, bekidi. Ótken júz jyldyqtyń basynda Qazaq avtonomııalyq Respýblıkasynyń alǵashqy astanasy bolǵan Qyzylorda jerine Alash qaıratkerleriniń ádebıet, ǵylym salasyndaǵy zııalylardyń shoǵyrlanyp, rýhanı qundylyqtarymyzdy saqtap qalý jolynda kúreskeni tarıhtan belgili. Olardy qýǵyn-súrginge ushyratý arqyly halqymyzdyń Táýelsizdikke degen arman maqsatyna tusaý salýdy kózdedi. Biraq Alash arystarynyń ómiri qatygezdikpen qıylsa da, olardyń rýhy óshpedi. Ótkenge salaýat aıtyp, saıası qýǵyn-súrgin jáne asharshylyq qurbandaryn jadymyzda saqtaý bizdiń qasıetti boryshymyz, - dedi QR Memlekettik hatshysy G. Ábdiqalyqova.

Mıtıngke qatysqandar eldik jolynda kóz jumǵan ata-baba rýhtaryna quran baǵyshtap, eskertkishke gúl shoqtaryn qoıdy.