Alash arystarynyń murasyna arnalǵan respýblıkalyq konferentsııa ótti
«Ótken jyly elimizde Alashorda ulttyq úkimetiniń 100 jyldyq mereıtoıy keń kólemde atalyp ótken bolatyn. Bul baǵyttaǵy is-sharalar legi áli de jalǵasyp jatyr. Óıtkeni, Alashorda ulttyq úkimeti 1917 jyly qurylǵanymen, Alash arystarynyń eń mańyzdy saıası sheshimderi 1918 jyly qabyldanǵan edi. Osydan týra 101 jyl buryn, Orynbor qalasynda, І-jalpy qazaq quryltaıy dál osy kúni bastalǵan bolatyn. Sol quryltaıda, 12 jeltoqsan kúni Alashorda úkimeti jarııalanyp, alashtyqtar barsha qazaqtan súıinshi suraǵan bolatyn. Mine, arada 101 jyl ótken soń sol Alash arystarynyń urpaqtary Áýlıeata tórindegi konferentsııada bas qosyp otyrmyz. Bul da bir tarıhı sáıkestik dep aıta alamyz», - dedi oblystyq ishki saıasat basqarmasynyń basshysy Berik Qurmanǵalı.
Sharaǵa arnaıy kelgen alashtanýdyń negizin qalaýǵa atsalysyp júrgen QR Ulttyq ǵylym akademııasynyń akademıgi, tarıh ǵylymdarynyń doktory, professor Mámbet Qoıgeldi sol kezdegi qazaq qoǵamynyń jaǵdaıyn, Alash zııalylarynyń azattyq jolyndaǵy ustanymdary jaıynda baıandady. Ol Alash arystarynyń sol kezdegi aıqyn ustanymy, ulttyq ıdeıasy ǵasyr ótse de mańyzdylyǵyn joımaǵanyn jetkizdi.
«1917 jyl qarsańynda qazaq qoǵamy ult-azattyq qozǵalys arnasynda turdy. Al qazaqqa keregi - ulttyq erkindik, ulttyq táýelsizdik, ulttyq memlekettilik bolatyn. Sol kezde Álıhan Bókeıhanov «Bizge táýelsizdik úshin kúres jaǵdaıynda tapqa jiktelý zııandy. Tapqa jiktelsek, ózara soǵysqa ketsek, azamat soǵysyna kirsek, onda biz azattyqpen qoshtasamyz» dedi. Sol kezdegi qazaq qoǵamy úshin osy tujyrym - jalǵyz durys ustanym edi», - dedi professor.
Sondaı-aq, konferentsııa barysynda birqatar tarıhshy ǵalymdar Alash tarıhy men ult zııalylarynyń ómirsheń ıdeıalary týraly tereńnen qozǵap, taǵylymdy málimetter men oramdy oılaryn ortaǵa saldy.
Ǵıbrat Sembaı