«Alash arystary Lenınniń qalqasynda qalyp otyr» - respýblıkalyq basylymdarǵa sholý
***
«Keshe Astanada Premer-Mınıstr Kárim Másimov pen Lıtva Respýblıkasynyń Prezıdenti Dalıa Grıbaýskaıteniń qatysýymen eki el kásipkerleriniń bıznes-forýmy ótti», - dep jazady «Egemen Qazaqstan» gazeti senbilik sanyndaǵy «Baıypty baılanystar baǵdary» degen taqyryptaǵy maqalasynda. Forým san taqyryptaǵy birneshe salany qamtydy. «Atameken» Qazaqstannyń ulttyq ekonomıkalyq palatasy men Lıtvanyń Óndirisshiler konfederatsııasy Qazaqstan-Lıtva iskerlik keńesin qurý týraly kelisimdi bekitse, elimizdiń Kólik jáne kommýnıkatsııa mınıstrligi men Lıtvanyń Kólik mınıstrligi ózara túsinistik týraly memorandýmǵa qol qoıdy. Jalpy Qazaqstan men Lıtva arasyndaǵy saýda-ekonomıkalyq baılanystar nyǵaıyp keledi.
«Egemen Qazaqstan» gazetiniń jazýynsha, keshe Aqorda rezıdentsııasynda Prezıdenttiń kómekshisi - Qaýipsizdik Keńesiniń hatshysy Marat Tájın AQSh-tyń Aýǵanstan men Pákistan elderi jónindegi arnaıy ókili Mark Grossmanmen kezdesý ótkizdi. Kezdesýge sondaı-aq, AQSh-tyń Qazaqstandaǵy elshisi Kennet Feırfaks qatysty. Taraptar kelissóz barysynda óńirlik qaýipsizdik máseleleri jóninde pikir almasty. Sonymen qatar, Aýǵanstandaǵy ahýaldy turaqtandyrýdyń erekshe mańyzdy ekendigi atap ótildi.
***
Bakýde ótip jatqan boksshylardyń álem chempıonaty búgin óz máresine jetedi. Eger dál qazir «júzden júırikterdiń» esimderi belgili bolsa, sanaýly saǵattardan keıin kimderdiń «myńnan tulpar» shyqqany anyqtalady. Bir aıta keterligi, bıylǵy jýan judyryqty jigitterdiń jarysynda eshbir memlekettiń ulttyq quramalary bir-birinen qara úzip kete alǵan joq. Ázirbaıjan astanasynda ústemdik tanytqan eshkim bolmady. Kóptegen komandalar kómbege birdeı jetti. Ázirbaıjan elinde ótip jatqan baıraqty básekeniń jarys kestesindegi jaǵdaıǵa nazar aýdarǵyńyz kelse, «Aıqyn» gazetiniń búgingi sanyndaǵy «Qaı eldiń kóshi ilgeri?» degen taqyryptaǵy maqalaǵa zer salyńyz.
«Aıqyn» gazetiniń jazýynsha, Reseıdiń «Otandastardy qonystandyrý» baǵdarlamasy aıasynda orystardyń Qazaqstannan ketýi ótken jyldarmen salystyrǵanda bıyl eki ese artqan. Osy sharýamen aınalysatyn Qazaqstandaǵy Reseı elshiligi konsýldiginiń jetekshi mamany Marına Pýstekonyń aıtýynsha, byltyr aı saıyn 120 qonystanýshy kýáligi berilse, bıyl bul kórsetkish 240-qa jetipti. Sońǵy aılarda Reseıge qonys aýdarǵysy keletinder tipti kóbeıip ketken. Qazir konsýldik kún saıyn 100 adamnyń ótinishin qabyldap, onyń 70-ine qonystanýshy kýáligin berip úlgeripti. Maqala «Atamekenine attanyp jatyr» degen taqyryppen berilgen.
***
Eskertkish - el ıdeologııasynyń quraly. Tarıhta bolǵan tulǵalardyń tas músinderine búgingi urpaq tamsana otyryp, olardyń atqarǵan is-áreketterinen tálim-tárbıe alýy qajet. alaıda qazaq bıligi kóp jaǵdaıda bul quraldy durys paıdalana almaı otyr. mysaly, Qyzyljardaǵy sán-saltanaty kelisken eń úlken eskertkish Lenındiki jáne bireý emes, úsheýi tur. Al qazaqtyń táýelsizdigi úshin basyn báıgege tikken talaı tarlannyń músinderi proletarıat kóseminiń tasasynda qalyp qoıýda. Sonda biz jastarǵa kimdi úlgi etip, nege tárbıelep jatyrmyz? Bul jaıynda «Alash aınasy» gazetiniń búgingi nómirindegi «Alash arystary Lenınniń qalqasynda qalyp otyr» degen maqaladan jan-jaqty bile alasyzdar.
***
«Premer-Mınıstr Kárim Másimov Esildiń sol jaǵalaýynda salynyp jatqan nysandardy aralady», - dep jazady «Kazahstanskaıa pravda» gazeti. Basylymnyń atap ótýinshe, Úkimet basshysy «Astana Medıa-Ortalyq» teleradıokesheniniń, Opera jáne balet teatrynyń, Trıýmfaldyq arkanyń, «Haziret Sultan» meshitiniń, Oqýshylardyń shyǵarmashylyq saraıynyń, jolaýshylar vagondaryn shyǵaratyn «Tulpar-Talgo» zaýytynyń qurylystary barysymen tanysty.
