Alarko Holding Qazaqstanda jańa ınvestıtsııalyq jobalardy iske asyrmaq

ASTANA. QazAqparat - QR Premer-Mınıstri Álıhan Smaıylov túriktiń Alarko Holding kompanııasynyń prezıdenti Iyldyz Ýmıt Nýrımen kezdesti. Bul týraly QazAqparat Úkimettiń baspasóz qyzmetine silteme jasap habarlaıdy.

Kezdesýde energetıka, temirjol jáne avtojol qurylysy, sý tazartý, qaldyqtardy qaıta óńdeý jáne t. b. salalarda jańa ınvestıtsııalyq jobalardy iske asyrý máseleleri talqylandy.

Úkimet basshysy birqatar iri ınfraqurylymdyq jobalardy iske asyrýǵa qatysyp jatqan Alarko Holding-tiń jumysy Qazaqstan úshin mańyzdy ekenin atap kórsetti. Qazirgi ýaqytta Almaty oblysynda Úlken Almaty aınalma avtomobıl jolyn salý jónindegi joba sátti aıaqtalýda.

«Meniń bilýimshe, kompanııa bosaǵan bilikti resýrsty, tehnıka men jabdyqtar parkin Qazaqstan aýmaǵynda basqa da jobalardy iske asyrý úshin paıdalanýǵa daıyn. Biz yntymaqtastyǵymyzdyń keleshegin egjeı-tegjeıli talqylaýǵa daıynbyz», — dedi Álıhan Smaıylov.

Premer-Mınıstr elimizdiń ózekti ınvestıtsııalyq pýlynda ekonomıkanyń túrli salalaryndaǵy 850-ge jýyq perspektıvti joba bar ekenin aıtty.

Óz tarapynan Iyldyz Ýmıt Nýrı atalǵan pýldy muqııat taldaýǵa, sondaı-aq Indýstrııa jáne ınfraqurylymdyq damý mınıstrligimen áleýetti jobalardyń túpkilikti tizbesin pysyqtaýǵa daıyn ekendigin atap ótti.

Kezdesý qorytyndysy boıynsha kelissózdi jaqyn arada jalǵastyrý týraly ýaǵdalastyqqa qol jetkizildi.

Foto: primeminister.kz