Al Arabiya: HAMAS pen Izraıl Gazada atysty 60 kúnge toqtatýǵa kelisti

ASTANA. KAZINFORM — Palestınalyq HAMAS qozǵalysy men Izraıl Gaza sektorynda atysty 60 kúnge toqtatýǵa kelisti, dep habarlaıdy TASS.

Al Arabiya telearnasy derekkózderiniń habarlaýynsha, AQSh prezıdentiniń arnaıy ókili Stıven Ýıtkofqa qaqtyǵys taraptary ol usynǵan kelisim jobasyn maquldaǵany týraly habarlanǵan.

— AQSh prezıdenti Donald Tramp kelisim týraly aldaǵy birneshe saǵat ishinde jarııalaıdy dep kútilip otyr, — dep habarlaıdy Al Arabiya derekkózderi.

Óz tarapynan HAMAS-qa jaqyn Quds portaly qozǵalystaǵy derekkózge silteme jasap radıkaldar «Ýıtkofftyń Gaza boıynsha usynysyn áli de zerttep jatyr» jáne «BAQ-tyń kelisimge qol jetkizilgeni týraly barlyq aqparat shyndyqqa janaspaıdy» dep málimdedi. HAMAS bul aqparatqa qatysty túsinikteme bergen joq.

Buǵan deıin ızraıldik Ynet portaly Ýıttkoftyń jańa usynysy anklavta atysty 60 kún boıy dereý toqtatýdy jáne birinshi aptanyń ishinde kepilge alynyp tiri qalǵan 10 adamdy eki kezeńde bosatýdy kózdeıtinin habarlady.

Onyń málimetinshe, birinshi aptanyń ishinde HAMAS sondaı-aq Izraılge kepilge alynyp qaza bolǵan 18 adamnyń denesin tapsyrýy kerek. Buǵan jaýap retinde Izraıl tarapy palestınalyq tutqyndardy buryn bekitilgen tizimderge sáıkes bosatady.

Budan basqa, qujatta Gazaǵa BUU jáne basqa da halyqaralyq uıymdar arqyly gýmanıtarlyq kómek jetkizýdi qalpyna keltirý týraly aıtylady. Beısenbi kúni Izraıl premer-mınıstri Bınıamın Netanıahý evreı memleketi Ýıtkoftyń jańa josparyn qabyldaıtynyn habarlady.

28 mamyrda Ýıtkoff Aq úıde tilshilerge AQSh jaqyn arada Izraıl men HAMAS-qa Gaza sektorynda atysty toqtatý sharttarynyń tizimin jiberýdi josparlap otyrǵanyn málimdedi. 25 mamyrda Katar úkimetiniń basshysy ári Syrtqy ister mınıstri Muhammed ben Abdýl Rahman Ál Tanı Gaza sektoryndaǵy qaqtyǵysty retteý boıynsha HAMAS pen Izraıl arasyndaǵy janama kelissóz tuıyqqa tirelgenin málimdedi.

Buǵan deıin Izraıl premer-mınıstri Bınıamın Netanıahý Izraıl HAMAS jetekshisi Mohammed Sınvardy joıǵanyn málimdedi.