Alaqan Mektep: oqýshylardyń bıometrııalyq derekteri qalaı qorǵalady
ASTANA. KAZINFORM – Elimizde oqýshylardyń mektepke kirýin baqylaýǵa, sabaqqa qatysýyn tirkeýge jáne keıbir qyzmetti avtomattandyrýǵa arnalǵan Alaqan Mektep bıometrııalyq júıesi qoldanylady. Sońǵy ýaqytta júıeniń zańdyq negizi men oqýshylardyń bıometrııalyq derekteriniń qalaı saqtalatynyna qatysty ata-analar tarapynan suraq kóbeıdi. Osyǵan baılanysty Kazinform agenttigi Oqý-aǵartý mınıstrligine resmı saýal joldady.
Júıe qandaı negizde engizildi
Vedomstvo málimetinshe, Alaqan Mektep júıesi Memleket basshysynyń bilim salasyndaǵy tsıfrlyq ınfraqurylymdy damytý jónindegi tapsyrmasy negizinde engizilgen. Sonymen qatar joba Bilim jáne ǵylym mınıstriniń 2022 jylǵy 30 naýryzdaǵy №117 buıryǵyna sáıkes qolǵa alynǵan. Qujatta bilim berý uıymdaryn kirýdi baqylaý jáne basqarý júıelerimen jabdyqtaý kózdelgen.
Mınıstrlik júıeni paıdalaný oqýshylar úshin mindetti emes ekenin atap ótti.
Bıometrııalyq derekter qalaı óńdeledi
Mınıstrliktiń málimetinshe, kámeletke tolmaǵan balalardyń bıometrııalyq derekterin óńdeýge tek ata-anasynyń nemese zańdy ókiliniń jazbasha kelisimi bolǵan jaǵdaıda ǵana ruqsat etiledi.
Eger ata-ana júıeni qoldanýdan bas tartsa, mektep balamaly sáıkestendirý tásilderin usynýǵa mindetti. Mundaı sheshim balanyń bilim alý quqyǵyn shekteýge sebep bola almaıdy.
Sondaı-aq mınıstrlik júıeni ázirlegen ári oǵan tehnıkalyq qyzmet kórsetetin kompanııa — Alaqan Technologies ekenin habarlady. Al derekterge jaýapty tarap retinde mektepterdiń ózi nemese jergilikti bilim basqarmalary belgilengen.
Júıe qalaı jumys isteıdi
Mınıstrlik túsindirgendeı, júıe alaqannyń bıometrııalyq erekshelikterin tirkep, ony qaıtalanbaıtyn tsıfrlyq hesh-kodqa aınaldyrady. ıAǵnı alaqannyń sýreti saqtalmaıdy. Sáıkestendirý matematıkalyq úlgilerdi salystyrý arqyly júrgiziledi.
Jınalǵan derekter mektepke kirýdi baqylaýǵa, sabaqqa qatysýdy esepke alýǵa, ashanada qolma-qol aqshasyz tólem jasaýǵa jáne keıbir mektep qyzmetterin paıdalanýǵa qoldanylady.
Mınıstrliktiń málimetinshe, aqparat úshinshi tulǵalarǵa berilmeıdi jáne tek jabyq bilim berý júıesiniń ishinde paıdalanylady.
Derekter qalaı qorǵalady
Mınıstrlik serverlerdiń Qazaqstan aýmaǵyndaǵy qorǵalǵan data-ortalyqtarda ornalasqanyn málimdedi. Sondaı-aq derekterge qoljetimdilik qatań baqylaýda bolady.
Budan bólek, júıe turaqty túrde aqparattyq qaýipsizdik tekseristerinen, sonyń ishinde tehnıkalyq aýdıtten ótedi.
Balama tásilder bar
Ata-analar balasynyń bıometrııalyq sáıkestendirýden ótýinen bas tartýǵa quqyly. Mundaı jaǵdaıda mektepter ID-karta, plastık ruqsatnama nemese QR-kod sekildi balama tásilderdi usynýy tıis.
Mınıstrlik júıe 1–12 synyp oqýshylarynyń barlyǵyna qoldanylýy múmkin ekenin málimdedi. Alaıda ony engizý týraly sheshimdi ár mektep ata-analar qaýymdastyǵymen birlesip qabyldaıdy.
Jobany qarjylandyrý Alaqan Technologies kompanııasynyń jeke qarajaty esebinen júrgiziledi. Júıe servıstik qyzmet kórsetý nemese memlekettik-jekemenshik áriptestik tetigi arqyly engiziledi. Al kelisim sharttary memlekettik satyp alý júıesinde kórsetiledi.
Aıta keteıik, Alaqan, CEREBRA jáne Parqour syndy shetelge tanylǵan qazaqstandyq IT-jobalar týraly jazǵan edik.
