Alaqan, CEREBRA, Parqour – Shetelge tanylǵan qazaqstandyq IT-jobalar ataldy
ASTANA. KAZINFORM – Sońǵy 5 jylda qazaqstandyq IT-qyzmetter eksportynyń kólemi 20 esege artty. Qazaqstandyq IT-ónimder men qyzmetter AQSh, Arab Ámirlikteri, Nıderlandy, Ulybrıtanııa, Germanııaǵa eksporttalady. Bul týraly Premer-Mınıstr Oljas Bektenov aıtty.
Prezıdent 2026 jylǵa qaraı IT-eksportynyń jalpy kólemin 1 mlrd dollarǵa deıin jetkizý mindetin qoıdy. Atalǵan mindetti iske asyrý úshin tıisti ınfraqurylym qurý jáne osy saladaǵy bıznesti qoldaý boıynsha jumys júrgizilýde.
− Bul sońǵy 5 jylda qazaqstandyq IT-qyzmetter eksportynyń kólemin 20 esege arttyrýǵa múmkindik berdi. Otandyq IT-ónimder men IT-qyzmetterdiń eksporty negizinen AQSh, Arab Ámirlikteri, Nıderlandy, Ulybrıtanııa, Germanııa jáne basqa da elderge baǵyttaldy. Alaqan, Codiplay, CITIX, CEREBRA, OGames, Parqour, ApartX sııaqty kóptegen qazaqstandyq jobalar shetel naryqtarynda jaqsy tanyldy, - dedi O. Bektenov Úkimettiń búgingi otyrysynda.
Úkimet basshysy IT-eksportty ulǵaıtý úshin aldaǵy jumystarda óńirlerdegi akseleratsııa baǵdarlamalaryn damytýǵa jáne seriktes-ınvestorlar qataryn keńeıtýge basa nazar aýdarý keregin aıtýda. Osy salanyń qozǵaýshy kúshi óńirlik IT-habtar men venchýrlik qorlar bolýǵa tıis.
− Qazaqstandyq startaperlerdiń ázirlemeleri aýqymdy qarjylandyrýdy qajet etetinin aıta ketken jón. Sondyqtan venchýrlik qor qurý rásimderin jedeldetý kerek. Sonymen qatar barlyq ǵylymı jáne ǵylymı-zertteý jumystaryn júrgizý rásimderin tsıfrlandyrý qajet. Tıisti platforma qazir jumys istep tur. Oǵan memlekettik organdardy, kvazımemlekettik sektor men jer qoınaýyn paıdalanýshylardy qosý qajet. Nátıjesinde bul otandyq ınnovatsııalyq ázirlemelerge degen suranysty arttyryp, olardyń halyqaralyq naryqtarǵa shyǵýyna yqpal etedi, - dedi Oljas Bektenov.
Aıta keteıik, Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev startaptarǵa qoldaý kórsetetin venchýrlik ınvestıtsııalar qory qurylatynyn aıtqan edi.
Buǵan deıin Qazaqstanda jańa mobıldi operator paıda bolýy múmkin ekeni habarlanǵan edi.