Alapat otpen arpalysqan elordalyq órt sóndirýshiler Qostanaı oblysynan oraldy

NUR-SULTAN. QazAqparat – Qostanaı oblysyndaǵy dala órtin sóndirýge attanǵan astanalyq órt sóndirýshiler turaqty jumys ornyna oraldy, dep habarlaıdy QazAqparat Nur-Sultan qalalyq Tótenshe jaǵdaılar departamentine silteme jasap.

«Qostanaı oblysyndaǵy orman órtimen 5 táýlik boıy arpalysqan órt sóndirýshilerdi elorda departamentiniń basshylyǵy men jeke quramy qoshemetpen qarsy aldy. Órt sóndirýshilerdi jalyn oshaǵyna Órt sóndirý qyzmeti bastyǵynyń orynbasary, polkovnık Rýslan Ekishev bastap bardy.

«Sizder jeńispen oralǵan naǵyz batyrsyzdar, osy oraıda sizderge alǵys bildiremin! Sizder atqarǵan jumysty, oryndalǵan mindetti Memleket basshysy joǵary baǵalady», - dep atap ótti Nur-Sultan qalalyq TJD bastyǵy Qýanar Bazarbaev.

Qostanaı oblysyndaǵy alapat órtti sóndirýge elordadan 98 órt sóndirýshi 18 órt sóndirý kóligimen kómekke bardy.

«Biz óz áriptesterimizge, elimizge qıyn qystaý kezde baryp, tilsiz jaýmen kúni-túni kúrestik, birlesken áreketterdiń arqasynda ottyń ary qaraı basqa aýyldarǵa taralýyna jol bermedik. Búgin mine, óz úıimizge sharshap jetsek te, elge qyzmet etip, qoıylǵan mindetti abyroımen atqarǵanymyz, jeńiske jetkenimiz bizge úlken kúsh-qýat beredi», - deıdi Qostanaı oblysynan kelgen órt sóndirýshilerdiń biri.