Alapat orman órti: Los-Andjeles mańynan 20 myń turǵyn evakýatsııalandy
ASTANA. QazAqparat - AQSh-tyń Kalıfornııa shtatynda alapat orman órti bolyp jatyr. Los-Andjeles qalasynyń ońtústik betinde bolyp jatqan tabıǵat apatynyń saldarynan 20 myń adam qaýipsiz jerge kóshirildi. Tilsiz jaý qazirdiń ózinde 13 úıdi jalmap úlgergen, dep habarlaıdy TASS Associated Press-ke siltememen.
Órt 80 sharshy kılometr aýmaqqa taralyp ketken. Tilsiz jaýmen 1500-den astam órt sóndirýshi arpalysyp jatyr. Jalynnyń shamamen 30 prtsentin ǵana aýyzdyqtaý múmkin bolǵan.
Beısenbi kún Kalıfornııa shtatynyń gýbernatory Djerrı Braýn apat ábigerge salǵan Orındj jáne Rıversaıd okrýgterinde tótenshe jaǵdaı jarııalaǵan bolatyn.
Shtat aýmaǵynda 17 jerden órt shyqqan. Olardyń jalpy aýmaǵy 1,8 myń sharshy kılometr jerdi alyp jatyr. Órtti sóndirýge 18 shtattan 14 myńnan astam órt sóndirýshi jumyldyrylǵan. Odan bólek Avstralııa men Jańa Zelandııadan kómek kúshi jetpek.
Túrli málimetter boıynsha oqıǵa saldarynan 8-10 adam qurban bolǵan.
