Alapat asharshylyq pen aıaýsyz qýǵyn-súrgin qazaq shejiresine eń sherli kezeń retinde jazyldy- Áshimbaev

ASTANA. QazAqparat - Memleket basshysynyń tapsyrmasy boıynsha Senat sońǵy eki jylda asharshylyq taqyrybyn zertteý jáne halqymyzdyń basynan ótken aqtańdaq jyldardyń aqıqatyn ashý baǵytynda júıeli jumys júrgizip keledi. Sonyń nátıjesinde derekti qujattar men estelikter jınaǵynyń bes tomy jaryq kórdi.

Bul bastama tarıhshy ǵalymdardyń joǵary baǵasyn alyp, qoǵam tarapynan oń qabyldandy, dep jazdy búgin óziniń Facebook paraqshasynda QR Parlamenti Senatynyń tóraǵasy Máýlen Áshimbaev.

«Búgin Saıası qýǵyn-súrgin jáne asharshylyq qurbandaryn eske alý kúni qarsańynda qasiretti kezeńniń izi qalǵan «QarLag» mýzeıine arnaıy baryp, babalar rýhyna taǵzym ettik, sondaı-aq, kópshilikke atalǵan jınaqtyń jańa 6-7-tomdaryn tanystyrdyq.

Bul eńbekke de osyǵan deıin esh jerde jarııalanbaǵan biregeı qujattar endi. Olardyń 90 paıyzy ǵylymı aınalymǵa alǵash ret shyǵarylyp, kópshilik úshin qoljetimdi dúnıege aınalyp otyr.

Shyn máninde, ótken ǵasyrdyń 30-jyldarynda bolǵan alapat asharshylyq pen aıaýsyz qýǵyn-súrgin qazaq shejiresine eń sherli kezeń retinde jazyldy. Tarıhymyzdyń osyndaı tragedııaly tustaryn zertteý, ashylmaı, jazylmaı kele jatqan jaıttardy zerdeleý eldik jáne ulttyq múdde turǵysynan asa mańyzdy. Jeti tomdyq jınaq osy baǵytta ǵylymı kózqaras qalyptastyratyn irgeli eńbek ekeni sózsiz»,-dedi Máýlen Áshimbaev.

Ol jalpy, tarıhty taný, ótkendi umytpaý ulttyq sanany jańǵyrtyp, ulttyq dúnıetanym qalyptastyrý jolynda aıryqsha mánge ıe ekenin aıtady. Sondyqtan aldaǵy ýaqytta Senattyń bastamasyn tıisti memlekettik organdar men ǵylymı ınstıtýttar qoldap, zertteýler jalǵasa beredi.

«Osy rette jınaqtyń jaryq kórýine atsalysqan ǵalymdarǵa, arhıvterdegi mamandarǵa, L.N.Gýmılev atyndaǵy Eýrazııa ulttyq ýnıversıtetiniń ujymyna, Mádenıet jáne sport mınıstrligine alǵysymyzdy bildiremiz.

Qaraǵandyǵa sapar barysynda óńirdegi máslıhat depýtattarymen de kezdesip, birlesken jumysymyzdyń basym baǵyttaryn talqyladyq. Shıkizattyq emes salany damytý, ınfraqurylymdy jańǵyrtý sııaqty Prezıdentimiz belgilep bergen mindetterdi iske asyrýdyń negizgi tetikterine nazar aýdardyq.

Sonymen qatar E.Bóketov atyndaǵy Qaraǵandy memlekettik ýnıversıtetiniń stýdentterimen júzdesip, jastardy alańdatqan máseleler jóninde sóz qozǵadyq. Sapar aıasynda erekshe qajettiligi bar sportshylardyń jattyǵýyna da qatysyp, olardyń jaı-kúıimen tanystyq.

Qazirgi tańda Qaraǵandy óńirinde kóptegen ıgi bastama nátıjeli iske asyrylyp jatyr. Aldaǵy ýaqytta da oblystyń odan ári qarqyndy damýyna shynaıy tilektestigimizdi bildiremiz»,-dedi Senat tóraǵasy.