Alańda qolyma túsken fotoapparat obektıvin 37 jyldan soń mýzeıge tapsyrdym - Altaı Janjigitov
Aqtóbelik Altaı Janjigitov 1986 jyly beıbit sherýge shyǵyp, óz oıyn ashyq jetkizgen jastardyń biri. Stýdenttik shaqta belsendi bolǵan ol sol kezde ortalyq alańda fotoǵa túsirip júrgen adamnyń fotoapparatyn tartyp alyp, obektıvin búginge deıin saqtaǵan. Jeltoqsan oqıǵasyna qatysýshy 37 jyl saqtaǵan dúnıesin mýzeıge tapsyrdy, dep habarlaıdy Kazinform.
Altaı Janjigitov Aqtóbe oblysynyń týmasy. 1986 jyly Almatydaǵy mal dárigerlik ınstıtýtynda bilim alǵan. Birinshi kýrs stýdenti 15 jeltoqsan kúni oqý ǵımaratynan jataqhanaǵa oralady. Sol sátte aldynan qazaq jigitteri shyǵyp, beıbit sherý týraly biledi.
«Erteńine saǵat 8-de sabaqqa barýymyz kerek edi. 8-ge 15 mınýt qalǵanda oqytýshylarymyz «sabaqqa baryńdar» dep esik qaqty. Biz esikti ashpadyq. Sóıtip júrgende bizdi múlde shyǵyrmaı qoıdy. Amalyn tapqandar apatty jaǵdaıǵa arnalǵan esik arqyly shyǵyp úlgergen. Al biz ekinshi qabattaǵy ashana balkonyna alasha baılap, syrtqa shyqtyq. Alańǵa barsaq, adam az eken. Aldymen bizdiń ınstıtýttyń balalary jetken. Keıin janymyzda turǵan jataqhana stýdentteri keldi. Jınala bastaǵanda mılıtsııa qyzmetkerleri: «Qazaqtyń jigitteri, nege jınalyp tursyńdar? Zań solaı, tarańdar!» - dep aıtty. Biz ketpedik. Jan-jaqtan stýdentter kelip, alań tola bastady. Sol kezde mılıtsııa ishke kirgizbeý, alańǵa jaqyndatpaý úshin qorshaý jasady. Kelýshilerdiń aldyn kes-kestedi. Adam kóp, oǵan qarap jatqan eshkim joq. Buzyp, jınala berdi. Bir kezde alań toldy. Árkim sóılep jatyr. Túske jaqyn «QazPI-diń qyzdaryn shyǵarmaı jatyr eken» degen habar keldi. Solaı qaraı bettedik. Jolda fotograftardy kórdik. Olar sýretke túsirip tur eken. Biz olardy qýyp jetip, fotoapparatyn tartyp aldyq. Plenkasyn tastap, aǵyzyp jiberdik. Sol tartyp alǵan fotoapparattyń obektıvin 37 jyl saqtap, mýzeıge tapsyrdym», - dedi Altaı Janjigitov.
Onyń aıtýynsha, sol kezde fotoapparatty tartyp almaǵanda, kóp jastardy qýdalaıtyn aıǵaq zat retinde qoldanylar edi.
«Arada 20 kún ótken soń ınstıtýtqa albom alyp keldi. Basshylaryn shaqyryp, kimdi tanıtandaryn surady. Keshkisin jataqhana kommendanty kelip tur. «Men bizdiń stýdentter joq dep aıttym», - dedi. Sol kezde kýrstasym Erlan Beısembaev foto arqyly sottaldy. Plakat ustap turǵan fotosy tabylǵan eken. Keıin aqtalyp shyqty. Sonymen birge klastasym Talǵat Jubaev foto arqyly qýdalaýǵa tústi. Obektıvti tartyp alǵan soń chemodanymda jatty. Sodan úıge ákelip, sandyqqa saldym», - dedi ol.
Altaı Janjigitov úsh kún alańda bolǵan. Alańdaǵy tolqý, jastardyń aýyzbirshiligi bári-bári kóz aldynda. «Meni eshkim ustaǵan joq. Sol úshin de jataqhana kommendantyna alǵys aıtamyn. Ol fotodan kórse de tanymaımyn, meniń stýdentim emes dep aman qaldym», - dedi jeltoqsanshy.
