Alan Qurmanǵalıev WTT Youth Contender týrnıriniń jeńipazy atandy

ASTANA. KAZINFORM —  Ústel tennısinen Qazaqstan quramasynyń 17 jasar ókili Alan Qurmanǵalıev Saýd Arabııasynyń Dammam qalasynda ótken WTT Youth Contender 2024 týrnıriniń jeńimpazy atandy.

Ol 19 jasqa deıingi sportshylar arasynda jekeleı synda barlyq qarsylastaryn jeńip, altyn medal jeńip aldy.

Álemdik reıtıngide 195-orynda turǵan otandasymyz jarysty ekinshi kezeńnen bastap, alǵashqy oıynda Saýd Arabııa ókili Álı Altaırdy 3:0 esebimen jeńse, shırek fınalda úndistandyq Saryz Mıshrany 3:1 esebimen qapy qaldyrdy.

Sondaı-aq, Alan Qurmanǵalıev jartylaı fınaldyq jáne fınaldyq básekede Úndistan ókilderi Djash Modı men Ankýr Bhattacharjıdy jeńdi.

Eske sala keteıik, 7-13 qazan aralyǵynda Astanada ústel tennısinen XXVII Azııa chempıonaty ótedi. 

Aıta keterligi Qazaqstan astanasy qurlyqtyq birinshilikti alǵash ret uıymdastyryp otyr.

Chempıonatqa Azııanyń búkil úzdik oıynshylary qatysady. Jarysta jalpy 26 elden barlyǵy 210 sportshy óner kórsetedi.

Medaldardy Bahreın, Gonkong, Úndistan, Iordanııa, Iran, Iemen, Katar, Qytaı, Qytaıdyń Taıbeıi, KHDR, Qyrǵyzstan, Malaızııa, Maldıv, Mońǵolııa, Nepal, Oman, Pákistan, Saýd Arabııasy, Sıngapýr, Taıland, Ózbekstan, Fılıppın, Shrı-Lanka, Ońtústik Koreıa, Japonııa jáne Qazaqstannyń shaǵyn raketka sheberleri ózara sarapqa salady.