Alan Qurmanǵalıev Germanııa chempıonatynda óner kórsetedi

ASTANA. KAZINFORM – Ústel tennısinen Qazaqstan quramasynyń ókili Alan Qurmanǵalıev tamyz aıynyń sońynda TTC Sachsenring Hohenstein-Ernstthal klýbynyń quramynda Germanııa Býndeslıgasynda (3-lıga) debıýttik kezdesýin ótkizedi. 

Ulttyq olımpıadalyq komıtettiń málimetinshe, qazaqstandyq sportshy qazirgi ýaqytta Germanııada júr. 

«Bremen qalasyna kóship keldim. Jańa komandada meni bári jaqsy qarsy aldy. Komanda sapyna taǵy tórt tennısshi qosylǵan. Biraq olardyń sheberlik deńgeıin áli tekserip jatyr. Munda alańsyz jattyǵý jasaýǵa barlyq jaǵdaı jasalǵan. Biz Germanııa chempıonatynyń jańa maýsymyna daıyndalyp, TTC Sachsenring Hohenstein-Ernstthal komandasyna paıdamyzdy tıgizýge, sheberligimizdi arttyrýǵa, shyńdaı túsýge tyrysamyz», - dedi A. Qurmanǵalıev. 

Eske sala keteıik, buǵan deıin ústel tennısinen Olımpıadaǵa qatysqan Gerasımenkoǵa eki bólmeli páter berilgenin jazǵan edik.