Alan Bóribaevtyń ónerine tánti bolǵan Gollıvýd juldyzy dırıjerdiń rólin somdaýǵa ýáde berdi

«Maǵan Qazaqstandy óte sulý adamdardyń mekeni dep aıtqan bolatyn. Ónerdi joǵary baǵalaıtyn, óner adamdaryn erekshe qurmet tutatyn halyq dep sıpattady jáne oǵan ózimniń de kózim jetti. Keshe mártebeli mınıstr Astana Operaǵa kontsertke shaqyrdy, onda Gýstav Mallerdiń segizinshi sımfonııasyn tyńdadyq. Alan Bóribaevtyń dırıjerligimen 1 200 mýzykant oryndaǵan bul týyndynyń ǵajaptyǵyn sózben aıtyp jetkize almaımyn. Mundaı keremetti esh jerden kórgen emespin. Alan Bóribaevtyń shabyt syılaǵany sonshalyqty, bolashaqta dırıjerdiń rólin somdaımyn dep óz-ózime sert berdim», - deıdi akter.

Ańyzǵa aınalǵan akter XIII halyqaralyq «Eýrazııa» kınofestıvaline qatysý úshin Astanaǵa keshe ushyp keldi. Kelisimen EKSPO, Astana Opera, Etnoaýyl syndy Astananyń kóz tartar oryndaryna tamashalady.

«Astanaǵa alǵash kelip otyrǵan joqpyn. Alaıda, ár saparym saıyn bul qala jańa ǵımarattarymen jáne erekshe oryndarymen tań qaldyrýdan jalyqpaıdy. Bir kúnde EKSPO, Astana Opera, Etnoaýyldy aralap shyqtym, mundaı qyzyqty baǵdarlama bolaryn kútpedim», - dep aǵynan jaryldy akter.

Aıta keterligi, 22-28 shilde kúnderi Astanada «Eýrazııa» kınofestıvali ótedi. Oǵan Nıkolas Keıdj, Endrıen Broýdı, Djon Malkovıch syndy álemge tanymal juldyzdar arnaıy keldi. Ataqty akterler óner ýnıversıtetiniń stýdentterine sheberlik sabaqtaryn ótkizetin bolady.

Festıval kezinde sońǵy bir jylda ekranǵa shyqqan fılmder kórsetiledi. Olardyń ishinde qysqa jáne tolyq metrajdy kartınalar, avtorlyq jáne janrlyq kıno bar. Budan bólek, «Bes qurlyq» atty balalar fılmderiniń konkýrsy uıymdastyrylady. Al Ortalyq Azııa men túrki tildes elder kınematografııa salasyndaǵy «Tulpar» ulttyq syılyǵy úshin baq synasady.

«XIII Halyqaralyq «Eýrazııa» kınofestıvali aıasynda alǵash ret Eurasia Film Market uıymdastyrylady. Oǵan fılmder naryǵynda júrgen satýshylar men satyp alýshylar qatysady.