Alan Bóribaev «Abaı» operasyn «Astana Opera» teatrynda sahnalaıdy

Premerasy 2015 jylǵy 1-2 mamyrǵa josparlanyp otyr, dep habarlaıdy «Astana Opera» teatrynyń baspasóz qyzmeti.

«Bul - uly mýzyka, bizdiń ata-babamyz úzdik óner týyndysyn jasaǵan jáne men onyń «Astana Opera» jańa óner ordasynda sátti shyǵatyndyǵyna bir sátke de kúmándanbaımyn», - dedi Alan Bóribaev.

Dırıjerdiń aıtýynsha, bul týyndy qazaq mádenıetiniń tórt birdeı kemeńger tulǵasynyń esimderimen baılanysty, olar: uly Abaı tulǵasy, lıbrettoshy Muhtar Áýezov jáne uly kompozıtorlar Ahmet Jubanov pen Latıf Hamıdı. «Abaı» operasy alǵash ret 1944 jyly Almaty qalasynda sahnalandy. Kompozıtorlar Muhtar Áýezovtiń lıbrettosyna mýzykany qysqa ýaqyt ishinde jazǵan bolatyn. 1958 jyly «Abaı» operasyna birshama ózgertýler engizildi, sodan beri 2014 jyly operany Alan Bóribaev sahnalaǵanǵa deıin qoıylymy ózgertilgen emes. Sondaı-aq maestro Bóribaev 2012 jyly Germanııada Ońtústik Tıýrıngııa Memlekettik operasy sahnasynda «Abaı» operasynyń eýropalyq tusaýkeserin iske asyrdy, ol avtorlardyń tóltýma ıdeıalaryn qalpyna keltirdi, partıtýrany qatelikter men túzetýlerden tazartty. Astanada «Abaı» operasy onyń oryndaýshylyq redaktsııasynda sahnalanatyn bolady.

«Meniń oıymsha, Jubanov pen Hamıdıdiń operasynda tunyp jatqan Abaı beınesiniń mánin ashý, mýzykalyq muranyń maǵynasyn qaıta qaraý árbir urpaqqa qajet dúnıe. Bizdiń árqaısymyz Abaıdy ózimizshe túsinemiz, árbireýimizdiń óz Abaıymyz bar, bizdiń kórermenderge kórsetkimiz keletini de osy», - dep atap ótti Alan Bóribaev.