Almaty men Astanadan Alakólge jetý jeńildeı tústi

ASTANA. KAZINFORM — Úrjar aýdanyna alǵash ret «SCAT» áýe kompanııasynyń ushaqtary qatynaı bastady, dep habarlaıdy Abaı oblysynyń ákimdigi.

Búgin Úrjar aýdanynyń Úrjar aýylyndaǵy áýejaıǵa alǵash ret «SCAT» áýe kompanııasynyń «CRJ-200» jolaýshylar ushaǵy qondy.

— Aýdan turǵyndary buǵan deıin «AN-24» ushaǵymen qatynap kelgen bolatyn. Endi «Úrjar-Almaty» jáne «Úrjar-Astana» baǵyttary boıynsha turaqty áýe reısteri aptasyna 7 ret, ıaǵnı kún saıyn oryndalatyn bolady. Bul jergilikti turǵyndarǵa ǵana emes, Alakól men óńirdiń basqa da týrıstik nysandaryna keletin qonaqtar úshin óte qolaıly. Áýe qatynasy memleket tarapynan sýbsıdııalanady. Sol sebepti bılet baǵasy da qoljetimdi, — delingen habarlamada.

Kanadada shyǵarylǵan «CRJ-200» ushaǵy 50 jolaýshyǵa shaqtalǵan. Áýe kemesi jaıly ári óńiraralyq baǵyttarǵa yńǵaıly.

Bıyl óńirde týrıstik maýsymǵa daıyndyq qarqyndy júrgizilip jatyr. Oblys ákimi Berik Ýálıdiń tikeleı qoldaýymen Alakól jaǵalaýyn abattandyrýǵa 658 mıllıon teńge qarjy bólindi. Qazirgi tańda 2018 jyldan beri jóndeý kórmegen Arbat jańartylyp, boıaý, syrlaý jumystary júrgizilip jatyr. Budan bólek jaǵalaýdaǵy eskirgen temir jaqtaýlar tolyq aýystyrylady. Jaǵalaýdaǵy 5 shaqyrymǵa jýyq jolǵa asfalt tóseledi, 10 modýldi, 15 bıodárethana, 40-tan astam kıim aýystyratyn kabınalar qoıylady, qoqys jáshikteri men beınebaqylaý kameralarynyń sany artady. Jaǵalaýdy nyǵaıtý úshin pırs jáne qalqyma ornatylady.

Erekshe atap óterligi, týrıster kóp keletin Arbattyń júktemesin azaıtý úshin jańa qoǵamdyq keńistik salynady. Munda 100 adamǵa arnalǵan saýda-sattyq oryndary qarastyrylady, úlken sahna, sýburqaq salynady, turǵyndar serýendeıtin arnaıy alań bolady.

Buǵan deıin Alakól jaǵalaýynda 2018 jyldan beri jóndeý jumystary júrgizilmegeni aıtylǵan edi.