Alakólge jazda 240 myń jolaýshy temirjol kóligimen tasymaldanady
ASTANA. KAZINFORM – «Jolaýshylar tasymaly» AQ jazǵy kezeńde joǵary suranysqa ıe týrıstik baǵyttarda 12 qosymsha marshrýtty iske qosty. Bul týraly kompanııanyń baspasóz qyzmeti málim etti.
— Astana, Almaty, Qyzylorda, Pavlodar, Semeı jáne Óskemen qalalarynan poıyzdardy qosa alǵanda, Alakól baǵytynda barlyǵy 13 marshrýt uıymdastyryldy. Onyń ishinde 11 baǵyt boıynsha «Jolaýshylar tasymaly» AQ poıyzdary, eki baǵyt boıynsha — jeke tasymaldaýshylar quramy júredi. Ulttyq tasymaldaýshy uıymdastyrǵan toǵyz marshrýt jazǵy kezeńge arnaıy iske qosyldy. Osy baǵyttarǵa tartylǵan ulttyq tasymaldaýshy poıyzdary aýa baptaý júıesimen tolyq jabdyqtalǵan, — delingen habarlamada.
Ótken jyl qorytyndysy boıynsha Alakól baǵytyna jáne keri qaraı temirjol kóligimen 236 myń jolaýshy tasymaldandy. Bıyl 240 myńǵa jýyq jolaýshyǵa qyzmet kórsetý josparlanýda. 2022 jyldan bastap osy baǵyttaǵy jolaýshylar aǵynynyń kólemi 90% ulǵaıdy, bul eldegi eń tanymal kýrorttardyń birinde demalýǵa turaqty joǵary suranysty kórsetedi.
— Alakólden basqa, Býrabaı kýrorttyq aımaǵy jolaýshylar arasynda dástúrli túrde tanymal. Jazda negizgi aǵyndy Astana, Almaty, Shymkent jáne Aqtóbe qalalary qamtamasyz etedi. Osy megapolıster arasynda júretin poıyzdar júkteme men suranystyń joǵary deńgeıin kórsetip otyr, — dep jazdy «Jolaýshylar tasymaly» AQ baspasóz qyzmeti.
«Jolaýshylar tasymaly» AQ jazǵy demalys kezeńinde servıs sapasyn arttyrý jáne búkil el boıynsha jolaýshylardyń qoljetimdi, jaıly qozǵalysyn qamtamasyz etý boıynsha jumysty jalǵastyryp otyr.
Alakólge qatynaıtyn poıyzdar:
№ 54/53 Astana — Dostyq
№ 254/253 Astana — Dostyq
№ 207/208 Almaty-2 — Jalańashkól
№ 221/222 Almaty-2 — Dostyq
№ 211/212 Almaty-2 — Dostyq
№ 457/458 Semeı — Dostyq
№ 459/460 Óskemen — Dostyq
№ 21/6942/6941/22 poıyzdar quramyndaǵy Almaty — Dostyq
№ 21/6942/6941/22 poıyzdar quramyndaǵy Qyzylorda — Dostyq № 31/6942/6941/32 poıyzdar quramyndaǵy Pavlodar — Dostyq
Suranysqa ıe baǵyttar boıynsha júretin poıyzdar:
№ 201/202 Astana-Almaty
№ 203/204 Astana-Shymkent
№ 219/220 Qaraǵandy-Balqash
Aıta keteıik, jazǵy maýsymda 11 baǵyt boıynsha qosymsha poıyzdar qatynaıtynyn jazǵan edik.