Alakólge laı sý aǵyzý oqıǵasy qaıtalanbas úshin Aqshı aýylyna káriz qubyry tartylady
NUR-SULTAN. QazAqparat – Almaty oblysy ákiminiń orynbasary Serikjan Beskempirov káriz qubyryn tartý boıynsha jobalyq-smetalyq qujat daıyn ekenin málim etti, dep habarlaıdy QazAqparat tilshisi.
Aıta ketsek, Almaty oblysyndaǵy Alakólge qubyr arqyly laı sý tógilip jatqany buǵan deıin habarlanǵan bolatyn. Aqshı aýylyndaǵy «Kóktem grand» demalys ornynyń basseıninen aqqan las sýdyń áleýmettik jelige taraǵan vıdeosy halyqtyń narazylyǵyn týdyrǵan. Búgin bul máseleni sý qaýipsizdigi máselesi talqylanǵan Parlament Senatynyń otyrysynda depýtat Dana Nurjigit qaıta kóterdi.
Senator kótergen máselege Almaty oblysy ákiminiń orynbasary Serikjan Beskempirov jaýap berdi. Onyń aıtýynsha, qazirgi ýaqytta Alakól jaǵasyndaǵy Aqshı aýylyna káriz júıesin tartý boıynsha jobalyq-smetalyq qujat daıyn ekenin jetkizdi.
«Kelesi jyldan bastap qurylys-montajdaý jumystary bastalady. Qazir de jergilikti káriz sýy jelileri bar. Jalpy, osy ýaqytqa deıin ol jerdiń ınfraqurylymy aıtarlyqtaı júrgizildi. Alakóldiń týrıstik tartymdylyǵyn arttyrý úshin Aqshı aýylyna baratyn jol jóndelip, jaryq tartyldy. Medıtsınalyq pýnkt salyndy. Káriz sýy júıesin tartý – úlken joba. Kelesi jyldan bastap qolǵa alamyz. Másele oblys ákiminiń baqylaýynda. Problemalyq suraqtar joıylady», - dedi ol.
Oblys ákiminiń orynbasary óz sózinde 200 demalys ornynyń bári tekserilgenin, kemshilikter joıylǵanyn málim etti.
Óz kezeginde Alakóldegi atalmysh másele jaıly senator Muhtar Qul-Muhammed te eskertý jasap, bolashaqta mundaı jaǵdaıdyń qaıtalanbaýy úshin naqty shara qabyldanýy kerektigin atap ótti.
«Jaǵalaýdy tolyǵymen teksergenderińiz durys. Óıtkeni, Eýropada Alakólden 5-10 ese kishkene kólderdi alaqanyna salyp, úlken týrıstik oryndarǵa aınaldyryp otyr. Bul sizderge sabaq bolýy kerek dep oılaımyn», - dedi senator.
