Alakólge kelýshilerdiń sany artýda
TALDYQORǴAN.QazAqparat - Almaty oblysyndaǵy Alakól jaǵalaýyna kelýshilerdiń sany artýda. Máselen byltyr kólde 450 myńnan astam týrıst demalsa, bıyl olardyń sany 700 myńnan asady dep josparlanýda. Shomylý maýsymy bastalǵannan beri qutqarýshylardyń jumysy da qaýyrt, dep habarlaıdy QazAqparat tilshisi.
Eki aptanyń ishinde qutqarýshylar sýdan 7 adamnyń ómirin aman alyp qaldy. Qazirgi tańda Almaty oblystyq Tótenshe jaǵdaılar departamentiniń kól jaǵasyndaǵy jedel qutqarý jasaǵynda 13 adam jumys isteıdi. Týrısterdiń qaýipsizdigine jaýapty mamandar demalýshylardan sýda barynsha abaı bolýdy suraıdy.
«Birinshiden, balalardy eresekterdiń baqylaýynsyz qaldyrmańyzdar. Іshimdik iship, sýǵa túspeńizder. Búgingi tańda 13 adam osy jasaqta jumys istese, onyń bireýi medbıke, qalǵandary qutqarýshylar men súńgýirler. Týrısterge sýda qaýipsizdik erejelerin saqtaý jóninde túsindirip, jumystar júrgizip jatyrmyz», - deıdi Alakól qutqarý bólimshesiniń jetekshisi Marat Smaǵulov.
Kúnniń aptap ystyǵynda Alakólge aǵylyp jatqandardyń qarasy qalyń. Sol sebepti demalýshylar sý polıtsııasyn qursa degen usynystaryn da aıtyp jatyr. Olardyń pikirinshe, mundaı qyzmet túri tártiptiń qatań saqtalýyna oń áser etedi.
Jalpy, búgingi tańda Alakól jaǵalaýynda 132 demalys orny halyqqa qyzmet kórsetýde. Bıyl 900 orynǵa arnalǵan taǵy 10 nysannyń ashylýy josparlanýda. Sondaı-aq týrısterdiń kelip-ketýine yńǵaıly bolý úshin arnaıy Aqshı aýylynda temir jol vokzaly salynyp jatyr. Joba quny 186 mln teńge. Qurylys bıyl mamyrda bastalyp, 1 qarashada aıaqtalady.
