Alakólge kelgen týrıster sany 11 paıyzǵa artty
ASTANA. KAZINFORM — Jetisý oblysynda Alakól kóliniń jaǵalaýyndaǵy týrıstik ınfraqurylymdy damytý jumystary jalǵasyp jatyr. Kýrort aýmaǵynda jańa nysandar salynyp, qaýipsizdik sharalary kúsheıtilgen, al týrıster aǵyny jyl saıyn artyp keledi. Bul týraly Týrızm jáne sport mınıstrligi málim etti.
Jetisý oblysyna jumys sapary aıasynda Týrızm jáne sport vıtse-mınıstri Mıras Tólebaev Jetisý oblysy ákiminiń orynbasary Marlen Kólbaevpen birge Alakól kóliniń jaǵalaýyna bardy. Sapar barysynda oblystyq týrızm basqarmasy týrıstik ınfraqurylymdy damytý baǵytynda atqarylǵan jumystardy tanystyryp, demalys aımaǵyn abattandyrý jáne qaýipsizdikti qamtamasyz etý boıynsha qabyldanǵan sharalar jóninde baıandady.
Alakól jaǵalaýy — elimizdegi eń tanymal týrıstik baǵyttardyń biri. 2025 jyldyń qorytyndysy boıynsha bul aımaqqa kelgen ishki týrıster sany 382 myń adamǵa jetip, ótken jylmen salystyrǵanda 11 paıyzǵa ósti. Al sheteldik týrıster sany 60 paıyzǵa artyp, 8,2 myń adamdy qurady. Qazirgi tańda jaǵalaýda bir mezette 21 myńnan astam adamdy qabyldaı alatyn 224 ornalastyrý orny jumys isteıdi.
Tekserý barysynda elektrmen jabdyqtaý nysandarynyń qurylysy aıaqtalǵany, Aqshı aýylynda káriz jelileriniń salynyp jatqany, tazartý qurylystarynyń, kommýnaldyq jaǵajaılardyń jáne Lepsi temirjol stantsııasyndaǵy jańa vokzaldyń qurylysy jalǵasyp jatqany atap ótildi.
Sondaı-aq kól jaǵalaýyndaǵy qaýipsizdik pen sanıtarlyq jaǵdaıǵa erekshe nazar aýdarylǵan. Demalys aımaǵynda qoqys jınaýǵa arnalǵan konteınerler, sanıtarlyq toraptar men kıim aýystyrý kabınalary ornatylǵan. Demalýshylardyń qaýipsizdigi úshin 40 qutqarý munarasy, jalpy uzyndyǵy 13 shaqyrym bolatyn qalqyma belgiler jelisi jáne 7 pırs qyzmet kórsetedi. Qoǵamdyq tártipti kún saıyn polıtsııa qyzmetkerleri qamtamasyz etedi, al sýda qutqarýshylar táýlik boıy kezekshilik atqarady. Maýsym bastalǵaly beri 150-den astam profılaktıkalyq reıd ótkizildi.
— Memleket basshysynyń tapsyrmasyna sáıkes mınıstrlik elimizdiń týrıstik baǵyttaryna sheteldik jáne ishki týrısterdi tartý jumystaryn jalǵastyrady. Bıyl Týrızmdi damytýdyń tujyrymdamasy jańartylyp, jyl basynan beri óńirlerde týrızmdi damytý jónindegi Jol kartasyn iske asyrý boıynsha belsendi jumys júrgizilýde. Óz kezeginde jergilikti atqarýshy organdar ınfraqurylymdy damytýǵa, qaýipsizdikti qamtamasyz etýge jáne aýmaqtyń sanıtarlyq tazalyǵyn saqtaýǵa jaýapty, — dedi Mıras Tólebaev.
Eske sala keteıik, Úkimet jaǵalaý syzyǵyn saqtap qalý úshin qorǵanys bógetin salý týraly sheshim qabyldaǵan bolatyn.
