Alakólge keletin týrısterdiń sanyn 1 mıllıonǵa jetkizýdiń amaldary qandaı
ASTANA. QazAqparat - Alakólge kelýshi týrısterdiń sanyn 1 mıllıonǵa jetkizý jolynda qandaı jumystar atqarylyp jatyr? Bul jóninde OKQ-da ótken baspasóz máslıhatynda Shyǵys Qazaqstan oblysynyń ákimi Danıal Ahmetov aıtyp berdi, dep habarlaıdy QazAqparat tilshisi.
«Alakólde qatty jel boldy. Ol jerde osynaý tabıǵı qubylystardyń ahýaly qıyn bolyp jatyr. Kóldiń jaǵasy jaıylyp barady. Sol sebepti, ınfraqurylymdyq kommýnıkatsııa salyp jatyrmyz. Al endi az bolsa da, jeldiń saldaryn az ýaqyttyń ishinde jóndep beremiz», - dedi Danıal Ahmetov.
Oblys basshysynyń aıtýyna qaraǵanda, Alakólge eki jyldyń ishinde 5,2 mlrd teńgeniń abattandyrý jumysy júrgizilgen.
«Bıyl Alakólge 500 myń halyq keldi. Úsh jyldyń ishinde biz osy kórsetkishti 1 mıllıonǵa jetkizýimiz kerek. Ol úshin ne istelýi tıis? Endigi jyly abattandyrý jumysyn taǵy da jalǵastyramyz. Taǵy da abattandyrý jumystary júrgiziledi. Úlken murajaı boı kóteredi. Sonda osy Alakólde birqatar máseleler sheshilýi kerek», - deıdi ol.
Aımaq basshysy óz sózinde kelesi jyly Alakóldiń jaǵasy budan da jaqsara túsetinin tilge tıek etti.
«Ondaǵy baq úsh ese ulǵaıady. Adamdar úshin sporttyq alleıa da sol jerde salynatyn bolady. Sonymen birge, Úrjar qalasyndaǵy áýejaıǵa júrgiziletin kúrdeli jóndeý jumystarynyń jobalyq-smetalyq qujat jumystaryn retteý bastalady. Bul rette biz týrızmniń birneshe baǵytyn damytýymyz kerek. Kelesi jyldan bastap ol jerde «Alakól-2019» festıvali uıymdastyrylady. Onda sporttyq saıystar ótkiziledi», - dedi óńir basshysy.
Danıal Ahmetov sonymen birge, Eleke sazynan tabylǵan «Altyn adamnyń» maketi sol jerge qoıylyp, kelgen týrısterge Shyǵys Qazaqstannyń baı tarıhy kórsetiletinin atap ótti.
«Osylaısha, biz úsh jyldyń ishinde Alakólge 1 mıllıon týrısti tartatyn bolamyz», - dedi oblys ákimi.
