Alakólge demalýshylardy jańarǵan vagondar tasymaldaıdy
Kópshilik jıi aıtatyn «vagondarda kondıtsıoner joq, ishi ystyq, sýy joq, vagondar tozyp ketken» deıtin shaǵymdardy eskerip, ákimdik «QTJ» AQ-men tıisti kelisim jasasyp jatyr.
Bul týraly Taldyqorǵandaǵy Jýrnalıster úıinde ótken brıfıng kezinde Almaty oblysynyń ákimi Qanat Bozymbaev aıtty.
Qanat Bozymbaevtyń aıtýynsha, Taldyqorǵannan Balqash kóline deıingi joldyń qurylysyna bıyl qosymsha qarjy bólý qarastyrylyp jatyr, jumystar jalǵasady.
Taldyqorǵan – Óskemen respýblıkalyq jolynyń Alakólge deıingi ýchaskesiniń qurylysy tıisti jumys kestesine sáıkes aıaqtalady.
«Biz qazir «Qazaqstan Temir Joly» AQ basshylyǵymen jańa maýsymda Alakólge jaqsy vagondar júrgizý týraly sóılesip jatyrmyz. Bir-eki aptada buǵan qatysty eki jaqty tıisti qujatqa qol qoıamyz. Balqash kóli jaǵalaýynda da týrıstik aımaq bolady. Tıisti jerler memleket menshigine qaıtarylyp alynǵan. Tek aldymen osy demalys aımaǵyna qonaq úı jáne basqa da týrıstik nysandar salǵysy keletin ınvestorlardy anyqtap alýymyz kerek. Sodan soń ǵana ınfraqurylymmen qamtý jumystaryn bastaımyz. Qurylys jumystarynyń tehnıka-ekonomıkalyq negizdemesi men jobalyq-smetalyq qujattary daıyn», - dedi Qanat Bozymbaev.
