Alakólge Boeing, Airbus ushaqtarymen barýǵa múmkindik týady

NUR-SULTAN. QazAqparat – Úrjar men Úsharal áýejaılary Boeing, Airbus ushaqtaryn qabyldaıtyn bolady. Bul týraly halyqqa esep berý kezdesýinde QR Indýstrııa jáne ınfraqurylymdyq damý mınıstri Beıbit Atamqulov aıtty, dep habarlaıdy QazAqparat tilshisi.

«Ushý qaýipsizdigin qamtamasyz etý jáne ishki týrızmdi damytý úshin Úrjar jáne Úsharal shaǵyn qalalarynda jergilikti atqarýshy organdar ushý-qoný jolaqtaryn jańartý boıynsha jumysty bastady. Jóndeý jolaýshylar úshin qolaısyzdyq týǵyzatynyn túsinemiz. Biraq jańartý aıaqtalǵannan keıin bul áýejaılar zamanaýı Boeing jáne Airbus reaktıvti ushaqtaryn qabyldaı alady», - dedi Beıbit Atamqulov.

Onyń atap ótýinshe, atalǵan qalalardyń áýejaılarynyń ushý-qoný jolaǵy jaǵartylǵannan keıin kelesi jaz mezgilderinde Alakólge baratyn týrıster sany artady.

«Áýejaılardy jańartý kezeńinde Alakól kóliniń qoljetimdiligin qamtamasyz etý úshin avtobýs jáne temirjol qatynasy ulǵaıtylady. Tıisti jumys júrgizilip jatyr. Fly Arystan loýkosteriniń marshrýttyq jelisin keńeıtý jáne reısterdi sýbsıdııalaý arqyly biz áýe tasymalyn halyq úshin qoljetimdi etemiz. Negizinde Balqash, Alakól, Kókshetaý sııaqty tanymal týrıstik baǵyttarǵa nazar aýdarylyp otyr. Bul maqsatqa 2,4 mlrd teńge bólindi. Búgingi tańda keıbir baǵyttar boıynsha ushý quny temirjol kóligimen júrýden arzan ekenin atap ótkim keledi», - dedi mınıstr.