Alakólge batyp, kóp sý jutyp qoıǵan adamdy tis dárigeri men sportshy aman alyp qaldy
ÓSKEMEN. QazAqparat – Shyǵys Qazaqstan oblysy Úrjar aýdanyndaǵy Alakól demalys ornynda sýǵa batyp kete jazdaǵan adam jaǵaǵa shyǵarylǵan, dem almaı jatqan ony sol mańda júrgen tis dárigeri men sportshy jasandy tynys aldyryp qutqaryp qaldy, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, Ásem Ómirbekova men Aıdos Serikqalıuly sýǵa tunshyqqan adamǵa jedel járdem qyzmetkerleri kelip jetkenshe alǵashqy medıtsınalyq kómek kórsetken.
«Ekeýi dostarymen birge Alakólge demalýǵa barǵan. Kenet olar sý jaǵasynda jatqan bireýdiń qasynda kóp adamnyń jınalyp qalǵanyn baıqaıdy. Ásem men Aıdos sol jaqqa qaraı júgire jóneldi. Belgili bolǵandaı, jańa batyp kete jazdaǵan adam sýǵa tunshyǵyp qalǵan. Aıdos onyń keýde tusyna massaj jasap, jasandy tynys aldyrý arqyly ómirin saqtap qalýǵa tyrysty. Ásem de qarap qalmaı oǵan kómek kórsetti. Osynyń arqasynda esin jıǵan er adam jedel járdem dárigerlerine tapsyrylǵan», - delingen aqparatta.
Aıta keteıik, Aıdos Serikqalıuly Semeıdegi djıý-djıtsý mektebin ashqan álem chempıony. Al Ásem Ómirbekova tis dárigeri bolyp jumys isteıdi.
