Alakóldiń Abaı jaǵalaýynda elektr jaryǵy bir jazda 33 ret óshken – Erbol Myrzabosynov

ASTANA. KAZINFORM – Týrızm jáne sport mınıstri Erbol Myrzabosynov Úkimet otyrysynda Alakóldiń jaǵasyn bekemdemese, birneshe demalys bazasy sýǵa ketetinin aıtty.

- Memleket basshysynyń týrıstik baǵyttardyń jaı-kúıin durystaý jónindegi tapsyrmasyn oryndaý úshin Prezıdent ákimshiligi jáne Úkimet apparatynyń ınspektorlarymen Býrabaı, Baıanaýyl, Katon-Qaraǵaı, Balqash, Qapshaǵaı, Alakól, Mańǵystaý kýrorttyq aımaqtaryna tekserý júrgizildi. Týrıstik maýsymnyń qyzǵan shaǵynda elektr jelisinde aqaýlar boldy. Mysaly, Abaı oblysyndaǵy Alakól jaǵalaýynda byltyrǵy týrıstik maýsym kezinde elektr jelisi 33 ret óship qalǵan. Qaraǵandy, Pavlodar, Abaı jáne Jetisý oblystaryndaǵy kýrorttyq aımaqtarda sýmen qamtamasyz etý jáne ortalyqtandyrylǵan káriz júıesi máseleleri áli de sheshilmegen. Sýdy, sonyń ishinde uńǵymalardy paıdalaný máselesine arnaıy nazar aýdarý qajet, - dedi ol.

Mınıstrdiń sózinshe, bul másele ásirese Alakól jaǵalaýynda asa ózekti bolyp tur.

- Alakóldiń eki bettegi jaǵalaýyna da jaǵany bekitý jumystaryn júrgizý qajet. Mysaly, Abaı oblysyndaǵy birqatar demalys bazalary qaýipti jerde. Olarǵa sý tym jaqyndap qalǵan. Osyǵan baılanysty bul máseleni sheshýdi keıingi qaldyrýǵa bolmaıdy, - dedi Erbol Myrzabosynov.

Aıta keteıik, búgingi Úkimet otyrysynda týrızmdi damytý máseleleri qaralyp jatyr.