Alakóldiń Abaı oblysyndaǵy jaǵalaýyn bekemdeýge 15,2 mlrd teńge jumsalady

ASTANA. KAZINFORM – Abaı oblysynyń ákimi Berik Ýálı Úkimet otyrysynda Alakóldiń jaǵalaýyn bekemdeýge 15,2 mlrd teńge kerek ekenin aıtty.

- Jyl saıyn Alakól jaǵalaýy qysqaryp, týrızm nysandaryna qaýip tóndirip jatyr. Bul týraly Týrızm jáne sport mınıstri de aıtty. Osyǵan baılanysty qaýipti 360 metr jaǵalaý anyqtalyp, byltyr kúzde 120 mln teńgege 60 metr aýmaqta jaǵany bekemdeý jumystary atqaryldy, - dedi ol.

Aıtýynsha, sonyń arqasynda 300 oryndyq 3 demalys orny sý basý qaýpinen qutqarylǵan.

- Al qalǵan barlyq jaǵalaýdy nyǵaıtýǵa qańtar aıynda jalpy quny 15,2 mlrd teńgege jobalyq-smetalyq qujatnama ázirlendi. Osy baǵyttaǵy jumystar jalǵasady, - dedi Berik Ýálı.

Sondaı-aq, Týrızm jáne sport mınıstri Erbol Myrzabosynov Alakóldiń jaǵasyn bekemdemese, birneshe demalys bazasy sýǵa ketetinin aıtty.