Alakóldiń jaǵasynda mýzeı salynyp jatyr
Mýzeı qurylysy mamyr aıynda ǵana bastalǵan bolatyn. Soǵan qaramastan, bıyl qoldanysqa berilýi tıis. Ol úshin jobaǵa engizilgen ózgeristerdi ýaqyt ozdyrmaı pysyqtap, qosymsha qarjy bólý qajet. Alakóldiń jaǵasynda bolyp, abattandyrý jumystarymen tanysqan oblys ákimi Danıal Ahmetov qajet dep tanylǵan 323 mln teńgeni bólýge daıyn ekenin aıtqan bolatyn. Bolashaqta munda baǵzy zamannan bergi qazaq tarıhynyń úsh myńnan astam qundy eksponaty qoıylady.
Úrjar aýdanynyń ákimi Serik Zaınýldınniń aıtýynsha, Alakól jaǵalaýyn abattandyrý jumysyna úsh jylda 4 mıllıard 363 mıllıon teńge kóleminde qarajat bólingen. Aǵymdaǵy jyly bul baǵytta 2 mıllıard 511 mıllıon teńgeniń jumystary atqarylmaq. Onyń ishinde negizgileri dep Barlyq-Arasan - Alakól jáne Maqanshy - Jalańashkól baǵytyndaǵy joldardyń jóndelýin aıtýǵa bolady. Buǵan qosa, kól jaǵasynda quny 157 mıllıon teńgelik saıabaq paıda boldy. Jaǵalaýdy abattandyrý jumystaryna 433 mln teńge qarastyrylǵan.
Byltyr bastalǵan Arbatty abattandyrý jumystary bıyl da jalǵasyn tapty. Bul maqsatqa 467,9 mıllıon teńge qarastyrylypty. Onyń ishinde elektr jelilerin tartý jumystaryna shamamen 50 mıllıon teńge bólingen. Jer-jerde shaǵyn sýburqaqtar men gúlzarlar, túrli pishindegi sáýlettik qurylystar paıda boldy. Jaǵajaıdyń da bet-beınesi halyqaralyq talǵamǵa saı ózgergen. Mundaǵy eń basty jańalyq - jaǵalaýdaǵy pırstiń ushyna alyp keme kelip qonbaq. Jospar boıynsha kemeniń ishinde zamanaýı meıramhana qyzmet kórsetetin bolady.
«Aldaǵy ýaqytta Arbattyń sol jaǵyndaǵy jaǵalaýdy abattandyrý jumystaryna kúsh salamyz. Bul maqsatqa 806,6 mıllıon teńge bólinbek. Onyń ishinde jerge tas tósenish pen dekıng tóseý, 900-den astam kishigirim sáýlet músinin, temir jaqtaýlar men júzý alańynyń belgilerin ornatý, sondaı-aq jasandy buǵaz salý jumystary josparlanǵan. Oblys ákiminiń tapsyrmasyna sáıkes, demalys qalashyǵy aýmaǵynda aqparattyq ortalyq qurylyp, jumysyn bastady», - deıdi Úrjar aýdanynyń ákimi Serik Zaınýldın.
Atalmysh aqparattyq ortalyqta týrısterge demalys bazalary qyzmet kórsetedi jáne sýdyń emdik qasıeti týraly tolyq aqparat tegin beriledi. Kelýshiler úshin demalys qalashyǵynyń úsh tilde jasalǵan kartasy usynylaýda.
Búginde kól jaǵalaýynda joǵary jyldamdyqtaǵy Internet jelisiniń joqtyǵy ózekti másele bolyp tur. Ázirshe kól aýmaǵynda 3G, 4G, Tele2 jáne Altel uıaly baılanys operatorlarynyń sıgnaldary ǵana qoljetimdi.
Aýdan ákiminiń aıtýynsha, keler jylǵa Maqanshydan Qabanbaı aýylyna deıin talshyqty-optıkalyq baılanys jelisin tartý jumystaryn bastaý josparlanǵan. Atalǵan maqsatqa jalpy somasy 268 mıllıon teńge kóleminde qarajat qajet.
Jyl saıyn kórkine kórik qosyp, servıs sapasy artyp kele jatqan Aıagózge keler jyly bıylǵydan da kóp týrıst keledi degen boljam bar. Oblys ákimi kelýshilerdiń ósimine demalys bazarlary da daıyn bolýy kerek dedi.
«Kól jaǵalaýyn abattandyrý úshin sońǵy eki jylda kyrýar jumys atqaryldy. Osy maqsatta 4,5 mlrd teńge qarjy jumsalmaq. Jumystar áli de jalǵasady. Aldaǵy úsh jylda jol máselesin tolyqtaı sheshý kózdelgen. Bıyl temirjol men áýe reısterin iske qostyq. Osy maýsymnan keıin keler jyly týrıstik orynǵa jetý úshin reısterdiń jıiligin qanshalykty arttyrý qajettigi anyqtalady», - dedi aımaq basshysy.
Aldaǵy jyly Alakól janyndaǵy jasyl parkti keńeıtý, jaǵalaýdaǵy abattandyrý jumystary jalǵasady. Danıal Ahmetov aýdan ákimine kól jaǵalaýyndaǵy jabaıy saýda máselesin rettep, shaǵyn bıznespen aınalysatyn kásipkerlerge arnaıy oryn bólip berýdi júktep otyr.
