Alakóldiń tazalyǵyna qosymsha 390 mln teńge bólindi
ALAKÓL. QazAqparat - Aıdyndy Alakóldiń Almaty oblysyndaǵy jaǵalaýynyń tazalyǵyn qamtamasyz etýge 390 mln teńge qarjy bólindi. Bul aqshaǵa «Alakól-tazalyq» kommýnaldyq sharýashylyǵy kúl-qoqys jınaıtyn zamanaýı tehnıka almaq, deıdi QazAqparat tilshisi.
Alakól aýdany basshylarynyń málimetinshe, qazirdiń ózinde kólge kelgen demalýshylar sany 1 mln-nan asqan. Al shıpaly kól jaǵasynan táýligine 8-10 tonna qoqys shyǵarylady. «Alakól-tazalyq» kommýnaldyq mekemesiniń qyzmetkerleri Aqshı aýylynda 12 shaqyrym, Kóktuma aýylynda 3 shaqyrym jaǵajaıdy kúnine úsh ret júrip ótedi. Qolmen jınalǵan qoqys arnaıy jáshikterge tógiledi. Al jáshikterden arnaıy kólikter 5 shaqyrym jerde ornalasqan polıgonǵa shyǵarady. Qazirgi tańda sharýashylyq qaramaǵynda 10 jumysshy jáne 5 tehnıka bar. Aldaǵy ýaqytta olardyń qataryn jańa, zaman talabyna saı kólikter men qosymsha jumysshy kúshi tolyqtyra túsedi, deıdi Alakól aýdandyq TÚKSh bólimi basshysynyń mindetin atqarýshy Erjan Nurpeıisov.
Jergilikti bılik jaǵajaıdaǵy tazalyqty qamtamasyz etýge bar kúshin salyp jatqanymen demalýshy qaýymnyń kúl-qoqys tógý mádenıeti syn kótermeıdi. Ásirese óz betimen jabaıy túrde demalýǵa keletin halyqtyń qaldyratyn turmystyq qaldyqtary jaǵalaýdyń sánin ketiredi. Qoqys jınap júrgen jumysshylardyń aıtýynsha, jaǵajaı boıynda 40 konteıner ornalasqan. Biraq keıbir qonaqtar sol jáshikke jetpeı, otyrǵan jerinde qoqys qaldyryp jatady.
Yrǵaıty aýyldyq okrýginiń ýchaskelik ınspektory Erik Oralbaevtyń málimetinshe: «Tek osy jyldyń eki aıynda 50 ákimshilik hattama toltyrylǵan. 12 aıyppul salynyp, 38 eskertý jasalǵan. Al bir azamat 5 táýlikke qamalǵan».
