Alakóldiń shyǵys jaǵalaýyn abattandyrýǵa 4 mlrd teńge bólindi

ÓSKEMEN. QazAqparat – Shyǵys Qazaqstandaǵy Alakól jaǵalaýyn abattandyrý jumystary jalǵasýda. Bıyl osy maqsatta 3,9 mlrd teńge jumyldyrylǵan, dep habarlaıdy QazAqparat tilshisi.

ShQO ákimi baspasóz qyzmetiniń málimetinshe, kól jaǵalaýynyń ınfraqurylymy jaqsartyldy. Alaıda keı kásipkerler qyzmet kórsetý sapasyn zaman talabyna saı oryndamaı otyr. Aımaq basshysy Danıal Ahmetov arbatty aralap, jaǵalaýdyń bas kóshesindegi qurylys talaptaryna sáıkes kelmeıtin dúńgirshekterdi alyp tastaýdy tapsyrdy.

«Ótken jylmen salystyrǵanda, munda ózgeris kóp. Men árdaıym kásipkerlerge kóńil aýdaryp, osynda keletin týrısterge joǵary deńgeıde qyzmet kórsetý kerektigin aıtyp kelemin. Bıznesmender túrik jaǵalaýlarymen básekeles bolyp, qyzmet kórsetý sapasyn álemdik standarttarǵa sáıkes júrgizýi tıis. Qoǵamdyq tamaqtandyrý salasymen aınalysatyn kásipkerler mol paıda tabady. Soǵan qaramastan demalys ornynda joǵary talapqa sáıkes keletin birde-bir meıramhana nemese dámhana joq. Ortalyqta ornalasqan tamaqtandyrý oryndarynyń ıeleri abattandyrý týraly, qyzmet kórsetý sapasy jóninde oılanbaıdy. Óıtkeni olar adamdardyń báribir ózderine keletinin biledi», - dedi ShQO ákimi.

Kól jaǵalaýynda 345 kásipkerlik nysan ornalasqan. Onyń ishinde 11,5 myń tósek-oryndyq 175 demalys úıi, 36 qoǵamdyq tamaqtaný orny, 27 dúken, 104 dúńgirshek, 3 dárihana bar.

Bıyl 8 jańa demalys orny salynyp, 11-i aýmaǵyn keńeıtti. Sóıtip, qosymsha 650 tósek-oryn paıda boldy. Sondaı-aq, 200 oryndyq «Alakol love» týrıstik kesheniniń qurylysy bastaldy. Budan bólek, «Jumyspen qamtýdyń jol kartasy» baǵdarlamasy boıynsha eki joba qolǵa alynǵan. Joba aıasynda sý jáne elektr jelileri tartylady.

Jalpy aýmaǵy 2,5 shaqyrymdy quraıtyn velojol men 5 jańa modýldi saýda pavılondarynyń qurylysy aıaqtaldy. Bıyl kól jaǵalaýynda jańa týaletter, kıinýge arnalǵan kabınalar, qutqarýshy beketteri salynbaq. Kelýshilerdiń demalysyn qyzyqty ótkizý maqsatynda sahna, bı jáne akvasaıajaı boı kóteredi.

«Úrjardaǵy áýejaıda qaıta jóndeý jumystary júrgizilip, ushý-qoný jolaǵy uzartylady. Osy baǵyttaǵy jumystar keler jyldyń sońyna deıin júzege asyrylady. Sondaı-aq, bizge Úrjar aýylyn abattandyrý da mańyzdy. Óıtkeni bul jer demalys oryndarynyń astanasy. Úrjardy abattandyrýǵa 2,2 mlrd teńge bólinedi. Úsh jyldyń işinde bul aýdan erekshe kórkeıtilmek», - dedi Danıal Ahmetov.

Esterińizge sala ketsek, osyǵan deıin Alakóldegi demalýshylar arasynda koronavırýs anyqtalmasa shekteýler alynatyndyǵy habarlanǵan.