Alakóldik balyqshy qysy-jazy balyq aýlap, el yryzdyǵyn eselep júr

TALDYQORǴAN. QazAqparat – Alakól kóliniń aq sazany, kókserkesi men aqbalyǵy ejelden elge áıgili. Balyǵy ónerkásip úshin qundy. Alakóldiń jaǵasyn qonystanǵan halyq balyqshylyqty kásip etken. Balyq aýlap, nápaqasyn taýyp júrgenderdiń biri - Nurjan Arynov, dep habarlaıdy QazAqparat tilshisi.

Balyqshynyń eńbegi – etek-jeńi kepkenshe. Bireýler úshin balyq aýlaý – ermek bolsa, endi bireýleri úshin kásip.

Alakóldik Nurjan Arynov 20 jylǵa jýyq osy salada eńbek etip keledi. Ózimen qatar, balalaryn da kásibı balyq aýlaýdyń úrdisine baýlyp júr.

Aıtýynsha, kóz asha kórgeni - qaıyq pen aý. Mektepten soń mamandyq tańdap, tehnıkým bitirgen.

Biraq, ata-babasy aınalysqan kásiptiń quty tartyp, qolyna aý alypty. Sanaly ǵumyry Alakóldiń aıdynynda ótip jatyr.

Qysy-jazy balyq aýlap, el yryzdyǵyn eselep júr.

«Kez kelgen jumystyń, kásiptiń ózine tán qıyndyǵy bolady. Sol sııaqty balyq aýlaý sharýasy da ońaı emes. Qysta, saryshunaq aıazda kóldiń ortasyna shyǵamyz. Muz oıyp, saǵattap otyryp balyq aýlaımyz. Jazda keshke aý quramyz. Tańerteń baryp alamyz. Ony saǵat toǵyzǵa deıin ótkizip úlgerýmiz kerek. Kóldiń tabıǵaty qıyn. Tolqyndar bolady. Jelmen arpalysyp jumysyń kúrdelenedi. Sonysymen de qyzyq. Ózime unaıdy»,- deıdi balyqshy.

Aýdan ortalyǵynda isiń dóngeletip otyrǵan azamat tań sáriden shyǵyp, jergilikti mekemelerge jańa aýlanǵan balyqty jetkizedi.

Kúnine 50 kelige jýyq balyq aýlaıdy. Keı kúnderi kún raıynyń kúrt ózgerýi jumysqa qolaısyzdyq týdyrady.

Máselen, jeldiń qatty soǵýyna baılanysty aıyqpen kólge shyǵyp, qarmaqqa túsken balyqty ala almaıtyn jaǵdaılar jıi bolyp turady.

«Buryn 20-30 aý qursaq, qazir onyń sanyn 40-qa jetkizdik. Qazir balyq azaıyp ketti. Negizi balyq sharýasynyń shyǵyny óte kóp. Qaıyq alasyń, onyń kerek-jaraǵy bar. Bári qymbat»,- dedi ol.

Nurjan Arynovtyń sózinshe, kásibin balalary jalǵastyrýǵa nıetti.

«Balalarym da osy kásipti úırenip júr. Men sııaqty balyq aýlap, jolymdy jalǵastyrmaqshy. Bolashaqta jańa qaıyqtar satyp alyp, sharýashylyqty keńeıtýdi josparlap otyrmyz. Úkimet te qazir ynta-yqylastaryna saı, balyq sharýashylyqtaryn damytýdy qunttap otyr»,-deıdi alakóldik balyqshy.

Aıta keteıik QR Ekologııa, geologııa jáne tabıǵı resýrstar mınıstrligi elde balyq aýlaýmen aınalysatyn sýbektiler úshin qosymsha qun salyǵy 70 paıyzǵa tómendeıtinin habarlaǵan bolatyn.