Alakóldegi demalys oryndaryna kelýshiler sany azaıtyp kórsetiledi
ÓSKEMEN. QazAqparat - Alakóldiń boıyndaǵy demalys oryndarynyń ıeleri salyqty tabysyna saı tólemeı otyr. Týrızm jáne syrtqy baılanystar basqarmasy basshysynyń orynbasary Marat Qabaqov ákimdiktiń apparat keńesinde osylaı aıtty, dep habarlaıdy QazAqparat tilshisi.
Onyń sózine qaraǵanda, demalys oryndaryna kelýshilerdiń sany sanaly túrde azaıtyp kórsetiledi. Salyq organyna ótken jazda barlyǵy 97 myńnan astam keldi degen aqparat berilgen. Basqarma bul aqparattyń jalǵan ekenin ózge derek kózderi arqyly dáleldepti.
«Biz uıaly baılanys operatorlary arqyly jaz maýsymynda Alakóldiń aýmaǵynda qansha abonent bolǵanyn anyqtadyq. Olar usynǵan aqparat boıynsha bir jazda 378 myń adam kelgen. Osydan-aq demalys bazalary aqparatty qanshalyqty burmalaǵanyn kórýge bolady» - dedi Marat Qabaqov.
Oblys basshysy Danıal Ahmetov Alakóldi elimizdiń týrıstik brendine aınaldyrý úshin memleket qansha kúsh salyp jatqanyn ataı kele, kásipkerlerden sonyń qaıtarymy bolý kerektigin qozǵady.
«Siz aıtyp otyrǵan 378 myń adamǵa telefon ustamaıtyn balalardy qosyńyz. Sonda bir jazda bizdiń Alakólge 500 myńnan astam keledi degen sóz. Bir ǵana Alakólde týrıstik maýsym kezinde 11,5 mlrd teńgeniń aınalymy júretinin anyqtadyq. Al sodan túsken salyq mólsheri 24 mln teńge ǵana. Eń tómengi úsh paıyzdyq mólshermen eseptegenniń ózinde bıýdjetke 330 mln teńgeden astam salyq tólenýi kerek bolǵan. ıAǵnı, demalys oryndary salyqtan jaltaryp otyr. Buqtyrma sý qoımasynda da osyndaı jaǵdaı bar. Bul soraqylyq týraly halyq ta bilýi kerek. Memleket jasaǵan jaǵdaıdyń qaıtarymyn jerlesteri qalaı ótep jatqanyn bilsin», - dedi aımaq basshysy.
Marat Qabaqovtyń aıtýynsha, oblystaǵy týrıstik oryndardan berilgen 1005 jer telimi maqsatyna saı qoldanylmaı otyr. Buqtyrma sý qoımasynda 644 telim, Sibe kólderinde 261 telim, Alakólde 100-den astam telim basqarmanyń jiti baqylaýyna alynǵan. Al jol boıyndaǵy 230 servıstik nysannyń toǵyzy ǵana talapqa saı bolyp otyr.
