Alakóldegi áýejaıdyń ushý jolaǵy úlken ushaqtar qoný úshin jańartylyp jatyr

TALDYQORǴAN. QazAqparat - Almaty oblysy Alakól aýdanyndaǵy Úsharal áýejaıynyń ushý alańy jańartylyp jatyr, dep habarlaıdy QazAqparat tilshisi.

Bul aldaǵy ýaqytta Airbus 320, Boeing 757 syndy iri ushaqtardy qabyldaýǵa múmkindik beredi.

Kúrdeli jóndeý jumystaryna 9,3 mlrd teńge qarastyrylyp otyr.

Uzyndyǵy 2,7 shaqyrym bolatyn jalpy qalyńdyǵy 52 santımetrlik beton quıý jumystary qarqyndy júrip jatyr.

100-den astam jumysshy eki aýysymmen eńbek etip júr. Ushý alańynyń qaýipsizdik sharalaryna erekshe mán berilip, qorshalyp, zamanaýı beınekamera ornatylady.

Serpindi joba aıdyndy Alakólge shetelden jáne elimizdiń basqa da aýmaqtarynan týrısterdiń kóptep kelýine jaǵdaı týǵyzady.

Bıyl kólge 1 mln-nan astam demalýshy keledi dep josparlanǵan.

«Qurylys 2021 jyly 1 qyrkúıekte bastaldy. Kelisimshart boıynsha 2023 jyly aıaqtalady. Biraq biz merziminen erte aıaqtaýǵa tyrysamyz. Bul ushý alańynyń ereksheligi - qazirgi zaman talabyna saı jaryq shamdary ornatylǵan. Ushaqtardy kúndiz de, túnde de qabyldaı alady»,- deıdi merdiger kásiporynnyń zerthana basshysy Dáýren Qulbekov.