Alakóldegi 14 demalys orny jumys isteýge ruqsat aldy
Demalys oryndarynyń basshylary ShQO ákimi Danıal Ahmetovti qoldap, monıtorıngilik toppen birge sanıtarlyq-epıdemıologııalyq talaptardyń qatań saqtalýyn tekserýge kiristi.
«Oblys ákimimin kezdesý ótti. Jıyn barysynda aımaq basshysy bizge demalys oryndaryn toltyrýdyń jańa jolyn aıtty. Sondaı-aq monıtorıngilik toppen birge jumys isteýdi usyndy. Endi top múshelerimen birge demalys oryndarynyń qonaqtardy qarsy alýǵa qanshalyqty daıyn ekenin qarap jatyrmyz. Óıtkeni demalýshylar men qyzmetkerlerdiń densaýlyǵy biz úshin birinshi orynda», - dedi «Іnjý» jáne «Alakól Arasan» demalys oryndarynyń ıesi Anar Batymova.
Reıd qorytyndysy boıynsha, 60 demalys orny maýsymǵa ishinara daıyn ekeni anyqtaldy. Qazir osy nysandarda sanıtarlyq-epıdemıologııalyq normalardy saqtaý jumystary júrgizilýde. 14 demalys ornyna týrısterdi qabyldaýǵa daıyn ekendigin rastaıtyn akti berildi. Bul nysandarǵa kelýshilerdiń 50 paıyzy (712 adam) ornalasa alady. 101 demalys orny daıyndyqty ázirshe bastaǵan joq. Sebebi olardyń deni 2-3 jaǵalaýda ornalasqan. Sáıkesinshe, olar 20 maýsymǵa qaraı ashylady.
«Biz barlyq sanıtarlyq-epıdemıologııalyq talaptardy oryndap, resmı túrde jumys isteýge ruqsat aldyq. Árbir shyǵaberis esikte sanıtaızerler qoıylyp, áleýmettik qashyqtyq saqtalǵan. Qorǵanys quraldary da bar. Bizde 100 paıyz qaýipsiz dep aıta alamyz. Qazaqstandyqtarǵa aıtar ótinishim, jedel testiden ótkenińiz týraly anyqtamany umytpaı ala kelińizder», - dedi «Parýs» demalys ornynyń ıesi Janna Ramazan.
Kásipkerler Alakól jaǵalaýyndaǵy qaýipsizdikti qamtamasyz etý mańyzdy ekenin túsinedi. Olar osy baǵyttaǵy atqarylatyn jumystarǵa úlken jaýapkershilikpen qaraıdy.
