Alakóldegi zańsyz qoqys polıgony týrısterdi shoshytty
SEMEI. KAZINFORM — Alakóldegi úıindi qordaly máselege aınaldy. Jaǵalaýdan nebári 12 shaqyrym jerde ornalasqan qoqys polıgony jergilikti turǵyndar men demalýshylardyń mazasyn qashyryp, júrip-turýyn qıyndatqan.
Dınara Sadyrbaeva jyl saıyn jumys babymen Alakólge jıi keledi. Sanıtarlyq talaptardyń saqtalmaýy men beıbereket tastalǵan qoqysqa kózi úırenip ketkenimen bıylǵy jaǵdaı burynǵydan da aýyr.
Onyń aıtýynsha, polıgonnan taraǵan ıisten demalý múmkin emes. Birneshe ret júk kólikteriniń lek-legimen qoqys tógip jatqan sátine de kýá bolǵan.
— Alakóldegi túrli demalys oryndarynyń qoqysy túgel osy polıgonǵa tógiledi. Sumdyq kórinis. Shirip jatqan qoqys birneshe shaqyrymǵa sozylyp jatyr. Polıgonǵa jaqyn ornalasqan eldi mekender úshin bul — óte úlken problema. Mundaı ekologııalyq jaǵdaıda ómir súrip jatqan adamdardyń densaýlyǵy ne bolmaq? Qajetti sharalardy shuǵyl qabyldaý kerek, — deıdi týrıst.
Abaı oblysynyń ekologııa departamenti bul máselege qatysty birneshe ret jergilikti atqarýshy organǵa hat joldap, shara qoldanýyn suraǵan.
Alaıda nátıje joq. Qaldyqtar jaıylyp, polıgon kólemi ári qaraı ulǵaıyp jatyr.
— 25 shildede departament qyzmetkerleri kóldiń jaǵalaýynda reıd júrgizdi. Kólden 12 km qashyqta ornalasqan jer ýchaskesinde qatty turmystyq qaldyqtar zańsyz saqtalǵan. Bul — Ekologııa kodeksiniń talaptaryna qaıshy. Sonymen qatar, departament qyzmetkerleri Alakóldegi kásipkerlermen kezdesý ótkizdi. Olarǵa qoqysty Alakól aýmaǵynda jınaýǵa ruqsat etilmeıtini túsindirildi, — deıdi mekemeden.
Departament málimetinshe, zańbuzýshylyq anyqtalǵan sátten bastap jergilikti atqarýshy organǵa birneshe hat joldanǵan, alaıda osy ýaqytqa deıin ákimdik kemshilikti joıý jóninde tıisti shara qabyldaǵan joq.
— Alakól jaǵalaýyndaǵy týrıstik aımaqty damytý Jol kartasyna sáıkes, qatty turmystyq qaldyqtar polıgonynyń jobalaý-smetalyq qujattamasy departamentpen kelisilýi tıis edi. Alaıda búgingi kúnge deıin mundaı qujat bizge kelip túsken joq, — delingen habarlamada.
Kazinform tilshisi osy máselege qatysty Maqanshy aýdandyq ákimdigine resmı saýal joldady.
Aıta keteıik, osyǵan deıin Memleket basshysynyń tapsyrmasy aıasynda Týrızm jáne sport mınıstri Erbol Myrzabosynov bastaǵan úkimet delegatsııasy Alakólge arnaıy baryp, jaǵdaımen tanysqan bolatyn. Tekserý nátıjesinde birqatar naqty tapsyrma berilip, jergilikti atqarýshy organdarǵa kemshilikterdi joıý úshin naqty merzim belgilengen.