Alakóldegi qaýipsizdik pen sanıtarııa máselesi Úkimet deńgeıinde qaraldy
ÓSKEMEN. KAZINFORM — Shyǵys Qazaqstan oblysyna jumys sapary aıasynda QR Premer-mınıstriniń orynbasary Ermek Kósherbaev ákimdikter, ortalyq memlekettik organdar, salalyq vedomstvolar men qoǵam ókilderiniń qatysýymen keńeıtilgen keńes ótkizdi. Bul týraly Týrızm jáne sport mınıstrligi málim etti.
Ermek Kósherbaevtyń aıtýynsha, ishki týrızmdi damytý – Qazaqstannyń ekonomıkalyq saıasatynyń basym baǵyttarynyń biri. Bul rette qaýipsizdikke, qyzmet kórsetý sapasyna, tsıfrlandyrýǵa jáne kórsetiletin týrıstik qyzmetterdiń ashyqtyǵyna erekshe nazar aýdarý qajet.
– Qazaqstan Respýblıkasy Premer-mınıstriniń tapsyrmasyna sáıkes aldymyzda naqty mindetter tur: týrızm salasyn tsıfrlandyrý, ınfraqurylymdy jaqsartý, qyzmet kórsetý sapasynyń standarttaryn engizý, ınvestıtsııalyq tartymdylyqty arttyrý jáne sanıtarlyq ári etıkalyq normalardyń saqtalýyna baqylaýdy kúsheıtý. Bul baǵyttar ortalyq jáne óńirlik deńgeıde júıeli túrde júzege asyrylýy tıis. Azamattar men el qonaqtary úshin jazǵy maýsymnyń qandaı bolatyny osy úılesimdi jumystyń nátıjesine baılanysty. Biz formaldy tásilge jol bere almaımyz – eger týrızmdi óńirlik damýdyń shynaıy qozǵaýshy kúshine aınaldyrǵymyz kelse, júıeniń árbir tetigi tıimdi ári halyqtyń ıgiligi úshin jumys isteýi qajet, – dep atap ótti Premer-mınıstrdiń orynbasary.
Týrızm jáne sport vıtse-mınıstri Erjan Erkinbaevtiń sózinshe mańyzdy mádenı, sporttyq jáne is-sharalardyń biryńǵaı kúntizbesi bekitilgen, is-sharalar týrıster keletin núktelerde QR-kodtar arqyly qoljetimdi ulttyq týrıstik portalǵa ornalastyrylǵan, alaıda keıbir óńirlerde bul tek formaldy túrde iske asqan, kýrorttyq aımaqtardyń bas josparlaryn tsıfrlandyrý tek eki óńirde aıaqtalǵan, qalǵandary kesteden keshigip otyr.
Alakól kólinde sýdaǵy qaýipsizdiktiń joqtyǵy, sanıtarlyq talaptardyń buzylýy, qoǵamdyq qoljetimdiliktiń shektelýi jáne salyq tártibiniń saqtalmaýy sııaqty máseleler de kóterildi.
Ermek Kósherbaevtyń tapsyrmasy boıynsha Týrızm jáne sport mınıstrligi basqa da tıisti organdarmen birge jaǵdaıdy tekserip, máselelerdi sheshý boıynsha usynystar ázirleýi tıis.
Shyǵys Qazaqstan oblysynyń oń tájirıbesi erekshe atap ótildi – munda týrızm basqarmasy qurylǵan, ınvestıtsııalyq jobalar júzege asyrylyp jatyr, onyń ishinde Rıdder qalasyndaǵy jyl boıy jumys isteıtin «Anataý» kýrorty bar. Bıyl mamyr aıynda oblysqa týrızm salasyna quıylǵan ınvestıtsııa kólemi ótken jyldyń sáıkes kezeńimen salystyrǵanda 86%-ǵa artqan.
Buǵan deıin habarlanǵandaı, Alakól baǵytyndaǵy vokzaldar jóndelip jatyr. Aqshı stantsııasynyń beketi táýlik boıy jumys isteıdi.