Alakóldegi adam ólimi: mınıstrlik sýdaǵy qaýipsizdikke baılanysty túsinikteme berdi

ASTANA. KAZINFORM — Mınıstrlik Kólik mınıstrligine, Іshki ister mınıstrligine, sondaı-aq jergilikti atqarýshy organdarǵa resmı hat joldap, sý aıdyndarynda demalýshylardyń qaýipsizdigin baqylaýdy kúsheıtý jóninde qatań usynys bildirdi. 

— Týrızm jáne sport mınıstrligi Alakól kólinde bolǵan qaıǵyly oqıǵaǵa baılanysty kóz jumǵan azamattyń týystary men jaqyndaryna qaıǵyryp, kóńil aıtady. Biz otbasy músheleriniń qaıǵysyna ortaqtasa otyryp, bul qaıǵyly jaǵdaıdyń barlyq mán-jaıyn jan-jaqty jáne ádil tergeýge, sondaı-aq kinálilerdi Qazaqstan Respýblıkasynyń zańnamasyna sáıkes jaýapkershilikke tartýǵa senim artamyz, — delingen habarlamada.

Mınıstrlik týrıstik maýsym aldynda jergilikti atqarýshy organdar men ortalyq quzyrly memlekettik organdardyń nazaryn, ásirese jaǵalaý men sý aıdyndaryndaǵy demalýshylardyń qaýipsizdigin qamtamasyz etý qajettiligine aýdarǵan bolatyn.

— Sonymen qatar sý kóligi qyzmetin retteý máseleleri, onyń ishinde lıtsenzııalaý, basqarýǵa ruqsat berý, tehnıkalyq tekseris jáne shaǵyn kólemdegi kemelerdi tirkeý — Týrızm jáne sport mınıstrliginiń quzyretine jatpaıdy. Osyǵan baılanysty, mınıstrlik Kólik mınıstrligine, Іshki ister mınıstrligine, sondaı-aq jergilikti atqarýshy organdarǵa resmı hat joldap, sý aıdyndarynda demalýshylardyń qaýipsizdigin baqylaýdy kúsheıtý jáne mundaı qaıǵyly oqıǵalardyń aldyn alý úshin barlyq qajetti sharalardy qabyldaý jóninde qatań usynys bildirdi. Mınıstrlik týrısterdiń qaýipsizdigin qamtamasyz etýge baǵyttalǵan keshendi sharalar júıesin jetildirý jáne ýákiletti qurylymdar tarapynan aqparattandyrý, aldyn alý jáne baqylaý máselelerin qosa alǵanda, vedomstvoaralyq ózara is-qımyldy nyǵaıtý jumystaryn jalǵastyrady, — delingen mınıstrlik habarlamasynda.

Aıta ketelik Alakólde kater qaǵyp ketken áıel kóz jumǵan edi.