Alakólde joǵalǵan telefon men qolsómke JI kameralary arqyly tabyldy
ASTANA. KAZINFORM - Abaı oblysynda joǵalǵan telefon men qolsómke JI kameralarynyń kómegimen 1 saǵatta tabyldy, – dep habarlaıdy Polisia.kz.
Óskemen turǵyny Alakól jaǵalaýynda demalyp júrip, telefony men qolsómkesin jaǵalaýda qaldyryp ketken. Zattaryn ózdiginen izdegenimen, taba almaǵan soń, polıtsııanyń modýldik pýnktine júgingen. Polıtsııa qyzmetkerleri birden iske kirisip, jaǵalaýdaǵy JI kameralarynyń jazbalaryn qaraı bastady. Kadrlardy muqııat tekserý barysynda joǵalǵan zattardy jaǵalaýdan ótip bara jatqan azamattyń taýyp alǵany jáne polıtsııaǵa tabystamaq bolǵany anyqtaldy. Kamera jazbalary men dron kómegi arqyly onyń júrgen baǵyty anyqtalyp, izdeý jumystary naqty baǵytqa kóshti.
Nátıjesinde demalýshynyń telefony men barsetkasyndaǵy barlyq zaty shamamen bir saǵat ishinde tabylyp, ıesine qaıtaryldy.
– Zattarymdy ózim taba almaı, qatty ýaıymdadym. Polıtsııa qyzmetkerleri birden kómek kórsetip, beınebaqylaý kameralary arqyly zattarymdy taýyp bergenine qýandym. Jedel áreketteri úshin alǵys aıtamyn, – dedi Óskemen qalasynyń turǵyny.
Joǵalǵan zattardy tabýǵa polıtsııa qyzmetkerleri Dastan Beıskanov pen Ulan Shora, sondaı-aq Erlan Kalıev kómektesti. Oqıǵa polıtsııa qyzmetkerleriniń jedel áreketi men beınebaqylaý júıesiniń tıimdiligin kórsetti. Alakólde polıtsııa qyzmetkerleri qoǵamdyq tártip pen qaýipsizdikti qamtamasyz etýmen qatar, demalýshylarǵa joǵalǵan zattaryn tabýǵa da kómektesip júr.
Osyǵan deıin ataýly áleýmettik kómekke muqtajdardy JI anyqtaıtyny týraly jazdyq.
