Alakólde joǵalǵan balalardy izdeýge jasandy ıntellekt kómektesedi
SEMEI. KAZINFORM – Alakól jaǵalaýynda polıtseıler joǵalǵan adamdardy izdeý úshin jasandy ıntellekt júıesin qoldana bastady.
Jańa tehnologııa adam ústindegi kıimniń sıpattamasy arqyly onyń júrgen jerin sanaýly mınýt ishinde anyqtaýǵa múmkindik beredi. Abaı oblysy polıtsııa departamentiniń málimetinshe, Alakólde jasandy ıntellekt elementterimen jabdyqtalǵan 223 beınebaqylaý kamerasy ornatylǵan. Olar qoǵamdyq oryndardy táýlik boıy baqylap, quqyq buzýshylyqtardyń aldyn alýmen qatar, demalýshylardyń ótinishterine jedel áreket etýge kómektesedi.
Buryn joǵalǵan bala nemese eresek adamdy izdeýge talaı polıtsııa qyzmetkeri jumyldyrylyp, jaǵajaılar men demalys oryndaryn aralap shyǵýǵa týra keletin. Endi adamnyń syrtqy belgilerin júıege engizý jetkilikti.
– Mysaly, adamnyń aq jeıde, qara shalbar kıgenin kórsetýge bolady. Jasandy ıntellekt taldaý júrgizip, kórsetilgen belgilerge sáıkes keletin adamdardy anyqtaıdy jáne olardyń kameralarǵa qaı jerde túskenin kórsetedi. Sonyń arqasynda izdeý ýaqyty aıtarlyqtaı qysqaryp, oqıǵa ornyna jaqyn mańdaǵy polıtsııa jasaǵyn jedel jiberýge múmkindik týady, – delingen aqparatta.
Bul tehnologııa ásirese adamdar kóp shoǵyrlanatyn demalys oryndarynda adasyp qalýy múmkin balalardy izdeý kezinde tıimdi. Sondaı-aq júıe demalýshylar umytyp ketken uıaly telefondar men basqa da zattardyń ornalasqan jerin anyqtaýǵa da kómektesedi.
Eske salsaq, osyǵan deıin Alakólde shomylý maýsymy bastalǵaly beri 10 bala joǵalǵany habarlanǵan.
