Alakólde jel turyp, tolqyn katamaranda otyrǵan tórt adamdy aıdynnyń ortasyna alyp ketti

TALDYQORǴAN. QazAqparat – Jetisý oblysy Aqshı aýylynda tórt jas adam, olardyń bireýi kámeletke tolmaǵan, katamaranmen júzip júrip jaǵadan alystap ketken, dep habarlaıdy QazAqparat tilshisi.

Jelmen kóterilgen tolqyn katamarandy sýdyń ortasyna aparyp tastaǵan. Bul týraly aqparat oblystyq TJD kezekshi pýltine 1 tamyz kúni tańǵy saǵat 5:15-te túsedi.

Avarııalyq-qutqarý jumystaryn júrgizý úshin shaqyrý ornyna dereý Jetisý oblysy TJD Alakól óńirlik jedel-qutqarý jasaǵynyń qutqarýshylary jiberildi.

Jetisý oblystyq TJD baspasóz qyzmetiniń málimetinshe, demalýshylar saǵat 5:40-ta jaǵadan 1,5 shaqyrym qashyqtyqta tabylyp, jaǵaǵa jetkizildi.

Qutqarylǵandarǵa sýdaǵy qaýipsizdik jáne qutqarý keýdeshelerin mindetti túrde kııý qajettigi túsindirildi.