Alakólde jaǵalaýdy sý shaıý qaýpine baılanysty tótenshe jaǵdaı jarııalandy

ASTANA. KAZINFORM — Abaı oblysy Alakólde jergilikti aýqymdaǵy tótenshe jaǵdaı engizildi. Bul sheshimdi Maqanshy aýdanynyń tótenshe jaǵdaıdyń aldyn alý jáne joıý jónindegi komıssııa qabyldady.

Jaǵalaý men demalys oryndaryna tóngen qaýip

Kabanbaı aýyldyq okrýginde ornalasqan jaǵalaýdy sý shaıý qaýpi tótenshe jaǵdaıǵa sebep boldy. Ol jerde ondaǵan týrıstik nysan, ıaǵnı demalys úıleri, dámhanalar men jeke qonaqúıler shoǵyrlanǵan. Jaǵalaýdyń buzylýy kásipkerlerge materıaldyq shyǵyn ákelip qana qoımaı, óńirdegi týrızmniń damýyna da keri áser etýi múmkin.

— Búgingi basty mindet — qıraýǵa jol bermeý jáne demalys nysandarynyń saqtalýyn qamtamasyz etý. Barlyq qyzmet daıyndyq rejıminde tur, — dep atap ótti Maqanshy aýdany ákiminiń orynbasary Álııa Sarbaeva.

Alakól — Qazaqstandaǵy ishki týrızmniń eń tanymal baǵyttarynyń biri sanalady. Maýsym kezinde jaǵalaýǵa ondaǵan myń demalýshy keledi. Alaıda jaǵalaýdy sý shaıý qaýpi kýrort ımıdjine áser etip, týrıster aǵynyn azaıtýy múmkin.

Jergilikti kásipkerlerdiń pikirinshe, tek saldarymen kúresip qana qoımaı, jaǵalaýdy qorǵaýdyń uzaq merzimdi sharalaryn da ázirleý mańyzdy.

— Biz Alakólde týrızmdi damytýǵa qomaqty qarjy saldyq. Infraqurylym máselesi júıeli túrde sheshilse, bıznes te senimdi bolar edi, — deıdi demalys bazasy ıeleriniń biri.

Aldaǵy qadamdar

Komıssııa sheshimine sáıkes, barlyq qajetti shara zańnamaǵa sáıkes qabyldanady. Qujat resmı jarııalaýǵa jáne aýdan ákimdiginiń ınternet-resýrsyna ornalastyrýǵa jiberildi. Oryndaýdy baqylaý Maqanshy aýdanynyń ákimi Dáýren Qoıgeldınge júkteldi.

Sarapshylardyń pikirinshe, Alakóldegi jaǵdaı jaǵalaýdy nyǵaıtý jáne ınfraqurylymdy jańǵyrtý jobasyn jedeldetip iske asyrýǵa túrtki bolýy múmkin.

Aıta keteıik, Prezıdent synynan keıin Alakólde qandaı ózgeris bolǵanyn sholyp ótken edik. 

Eske salsaq, bıyl jazda Alakóldegi adam óliminen keıin mınıstrlik sýdaǵy qaýipsizdikke baılanysty túsinikteme berdi. 

Sondaı-aq Alakólde kater qaǵyp ketken áıel kóz jumdy.