Alakólde úırekterdiń qyrylýy: Tekseris qorytyndysy jarııalandy
NUR-SULTAN. QazAqparat – «Qazgıdromet» RMK Alakóldegi jabaıy qustardyń qyrylýyna qatysty tekseris qorytyndysyn jarııalady, dep habarlaıdy QazAqparat.
Qazgıdromet» RMK Alakól kólinde jabaıy qustardyń ólýine baılanysty 20 shildede kólden sý synamalaryn alyp, 41 ıngredıent boıynsha hımııalyq taldaý júrgizdi. «
Balyq sharýashylyǵynan basqa, sý paıdalanýdyń barlyq sanattary úshin qoldanylatyn sý sapasyn taldaýdyń biryńǵaı júıesine sáıkes, magnıı, hlorıdter, mıneraldaný boıynsha kórsetkishten asyp ketýi tirkeldi. Atap aıtqanda, magnıı kontsentratsııasy – 316 mg/dm3, hlorıdter – 748 mg/dm3, mıneraldaný – 4946 mg/dm3. Hlorıdter men mıneraldanýdyń naqty kontsentratsııasy fondyq klastan aspaıdy, al magnıı fondyq klastan asqan. Alakól kóli boıynsha sý temperatýrasy 27-28,6 ºC deńgeıinde boldy, sýtegi kórsetkishi 8,29-8,97, sýda eritilgen otteginiń kontsentratsııasy 7,55-7,67 mg/dm3, túsi 9-17 gradýs, ıisi bolǵan joq», - dep habarlady Qazgıdrometten.
Budan bólek, 26 shildede 5 táýlik boıy jasalatyn «ottegini bıohımııalyq tutyný 5» taldaýynyń nátıjeleri jarııalanady.
Aıta ketsek, buǵan deıin Ekologııa, geologııa jáne tabıǵı resýrstar mınıstrliginiń orman sharýashylyǵy men janýarlar dúnıesi komıtetiniń baspasóz hatshysy Sáken Dildahmet Alakóldiń Araltóbe shaǵyn aralyndaǵy qyzyl úırekterdiń qyrylý faktisiniń mán-jaıy anyqtalyp jatqanyn habarlaǵan bolatyn .
