Alakól jańaryp jatyr: jaǵalaý men joldar jóndelip, qaýipsizdik sharalary kúsheıtildi
SEMEI. KAZINFORM — Oblystyq bıýdjetten bólingen 1,5 mlrd teńgeden astam qarajat esebinen jaǵalaýdaǵy ınfraqurylym jańartylyp jatyr, dep habarlaıdy Abaı oblysynyń ishki saıasat basqarmasy.
— Alakól — Abaı oblysynyń ǵana emes, búkil Qazaqstannyń týrıstik áleýeti joǵary aımaqtarynyń biri. Jaz mezgilinde myńdaǵan demalýshyNy baýrap alatyn kórkem kól jaǵalaýynda bıyl kóptegen jańashyl joba iske asyp jatyr. Aımaq ákimdigi men tıisti organdardyń keshendi jumystary nátıjesinde týrısterdiń qaýipsiz ári jaıly demalýyna jaǵdaı jasaý basty basymdyqtardyń birine aınaldy, — delingen habarlamada.
Vedomstvo atap ótkendeı, oblystyq bıýdjetten bólingen 1,5 mlrd teńgeden astam qarajat esebinen jaǵalaýdaǵy ınfraqurylym jańartylyp jatyr.
— Arbat aımaǵynda jóndeý jumystary júrgizilip, demalys aımaqtary men saýda oryndaryn qamtıtyn keńistik qurylady. Jaǵalaýdyń sanıtarlyq jaǵdaıyn jaqsartý úshin 25 modýldik dárethana, 35 kıiný kabınasy, 50 qoqys jáshigi, 86 beınebaqylaý kamerasy ornatylmaq. Kól mańyndaǵy joldardyń sapasy da nazardan tys qalǵan joq. Jalpy quny 1,09 mlrd teńgege jýyq somaǵa 21 shaqyrym jol jóndelip jatyr. Sonymen qatar, qatty turmystyq qaldyqtar polıgonynyń jobalyq qujattamasy daıyndalyp jatyr, — delingen basqarma taratqan habarlamada.
Týrısterge qolaıly kólik qatynasyn qamtamasyz etý maqsatynda 2025 jylǵy maýsymda Alakól baǵytyna avto, áýe jáne temirjol qatynastary uıymdastyrylady. «Scat» jáne «Ońtústik aspan» áýekompanııalary arqyly aptasyna 19 reıske deıin ushý josparlanyp otyr. Temirjol baǵytynda «Semeı — Jalańashkól» poıyzy, al avtokólikpen 9 baǵyt boıynsha qatynas qamtamasyz etiledi.
— Qaýipsizdik — basty nazarda. Jaǵalaýda arnaıy oqytylǵan 10 qutqarýshy, 7 munara, 7 pırs jáne býılarmen jabdyqtalǵan 5 shaqyrym jaǵalaý shomylý maýsymynda qaýipsizdikti qamtamasyz etedi. Sonymen qatar, týrısterge 45 polıtsııa qyzmetkeri jáne 14 medıtsına qyzmetkeri kómek kórsetýge daıyn. Alakól mańynda «Qazaq Oil» janarmaı beketiniń ashylýy — óńir turǵyndary men qonaqtaryna kórsetilgen taǵy bir úlken qoldaý boldy. Alakól — jaıly demalys, qaýipsiz orta jáne zamanaýı ınfraqurylymnyń úılesimdi úlgisi, — dep túıindedi basqarmanyń baspasóz qyzmeti.
Buǵan deıin Alakólge jazda 240 myń jolaýshy temirjol kóligimen tasymaldanatyny aıtyldy.