Alakólde sýǵa bata jazdaǵan 16 adam qutqaryldy
TALDYQORǴAN.QazAqparat - Bıyl Alakóldiń Almaty oblysyndaǵy aýmaǵynda sýǵa batyp kete jazdaǵan 16 adam qutqaryldy. Almaty oblystyq TJD qyzmetkerleri sýǵa shomylý maýsymynyń eń qyzǵan shaǵynda Alakól kóliniń jaǵalaýynda aýqymdy aldyn alý is-sharasyn uıymdastyrdy, dep habarlaıdy QazAqparat tilshisi.
Aqshı jáne Kóktuma aýyldaryndaǵy demalýshylarǵa sýdaǵy qaýipsizdik erejeleri túsindirilip, jadynamalar taratyldy. Adamdar kóp shoǵyrlanǵan jerlerde qutqarý jáne sýǵa batqan adamǵa alǵashqy medıtsınalyq kómek qalaı kórsetý kerektigi kórsetildi.
«Sondaı-aq aldyn alý aktsııasy aıasynda qutqarýshylar Kóktuma aýylyndaǵy «Shaǵala» jazǵy lagerinde boldy. Onda 60 bala demalýda. Balalar qutqarýshylar men lager qyzmetkerleriniń baqylaýymen kúnine 2 ret kólge shomylady. Oblystyq TJD apparatynyń qyzmetkerleri kezekti nusqaýdy ótkizgennen keıin jáne sýda júze almaıtyn balalardy anyqtaǵannan keıin balalardy kólge aparyp, júzýdi úıretti», - delingen atalǵan vedomstvonyń baspasóz qyzmeti taratqan aqparatta.
Aıta keteıik, Alakólde demalatyn týrıster sany jyldan jylǵa artýda. Osyǵan baılanysty Alakól óńiriniń qutqarý stantsııasynyń qyzmetkerleri kúsheıtilgen rejımge kóship, jumys isteıdi. Qutqarýshylar júze almaıtyn adamdarǵa arnaıy sýǵa shomylatyn balondarsyz kólge túspeýge keńes beredi. Sondaı-aq, ishimdik iship, sýǵa túspeýdi eskertedi.
«Alakól óńiriniń qutqarýshylary osy jyly 16 adamdy qutqardy. Sýǵa batqandardyń bireýi — bala. Alakólde adamdardyń qaza bolýy tirkelgen joq», - dep tolyqtyrdy oblystyq TDJ baspasóz qyzmetinen.
