Alakólde shomylý maýsymy 15 maýsymda bastalady
ASTANA. KAZINFORM – Jetisý oblysyndaǵy Alakól jaǵalaýynda shomylý maýsymy resmı túrde 15 maýsymda bastalady. Bıyl óńir eki mıllıonnan astam týrısti qabyldaýdy josparlap otyr.
Alakól aýdany kásipkerlik jáne týrızm bóliminiń bas mamany Tasqyn Bekmurzaevtyń aıtýynsha, kól jaǵalaýynda 320 demalys orny jumys isteıdi. Onyń ishinde 270 nysan Aqshı aýylynda, al 50 demalys orny Kóktuma aýylynda ornalasqan.
Mamannyń sózinshe, Alakólge keletin týrıster sany jyl saıyn artyp keledi. 2024 jyly óńirdegi ornalastyrý oryndary 1,7 mıllıonnan astam demalýshyny qabyldasa, 2025 jyly bul kórsetkish 1,8 mıllıon adamǵa jetken.
– Bıylǵy maýsymda Alakól eki mıllıonnan astam týrısti qabyldaıdy dep kútilýde, – dedi Tasqyn Bekmurzaev.
Qazir kól jaǵalaýynda shomylý maýsymyn ashýǵa daıyndyq jumystary aıaqtalýǵa jaqyn. Demalys oryndary, qonaq úıler men ózge de týrıstik ınfraqurylym nysandary kelýshilerdi qabyldaýǵa ázirlenip jatyr.
Mamandardyń aıtýynsha, Alakól Qazaqstandaǵy ishki týrızmniń eń tanymal baǵyttarynyń biri bolyp qala beredi. Jyl saıyn munda kóldiń biregeı tabıǵaty, damyǵan týrıstik ınfraqurylymy jáne otbasylyq demalysqa qolaıly jaǵdaılar qyzyqtyrǵan mıllıondaǵan týrıst keledi.
Aıta keteıik, maýsym aıynan bastap Balqash pen Alakól baǵyttaryna qosymsha poıyzdar qatynaı bastaıdy.
