Alakólde polıtsııa maıory birneshe týrıstiń ómirin qutqaryp qaldy
ASTANA. KAZINFORM – Alakól aýdanyndaǵy Kóktuma aýylynda aýa raıynyń kúrt nasharlaýyna baılanysty kólde demalyp júrgen birneshe adam qaýipti jaǵdaıǵa tap boldy. Olardy polıtsııa qyzmetkeri qutqaryp qaldy.
Týrıstik maýsym kezinde Alakól jaǵalaýynda qyzmet atqaryp júrgen polıtsııa maıory Jaqsylyq Sársenov jaǵadan shamamen 500 metr qashyqtyqta sapbordpen júrgen tórt adamdy baıqaıdy. Qatty jel men kóterilgen tolqyndar olardyń jaǵaǵa ózdiginen oralýyna múmkindik bermegen.
- Ýaqyt joǵaltpaǵan tártip saqshysy Kóktuma aýylynyń turǵynymen birge kómekke asyǵady. Aldymen olar Reseı Federatsııasynyń Magadan qalasynan kelgen týrıst áıeldi qutqaryp, jaǵaǵa jetkizgen.
Keıin onyń qutqarý keýdeshesin paıdalanyp, ekinshi týrıst áıelge jetip, ony da qaýipsiz jerge shyǵarǵan, - dep jazdy ІІM baspasóz qyzmetinen.
Qutqarylǵandardyń aıtýynsha, sýda júze almaıtyn jáne qutqarý keýdeshesin kımegen 30 jastaǵy áıel qalyp qoıǵan. Sonymen qatar kólde Almaty qalasynan kelgen taǵy eki demalýshy bolǵan.
«112» qyzmetine habarlasqan kezde qutqarýshylardyń jetýine belgili bir ýaqyt qajet ekeni belgili bolǵan.
Osyǵan baılanysty polıtsııa maıory Jaqsylyq Sársenov pen aýyl turǵyny qutqarýshylar kelgenge deıin áıelge qutqarý keýdeshesin jetkizip, ony sý betinde ustap turý arqyly qaıǵyly jaǵdaıdyń aldyn alǵan.
Jedel ári úılesimdi árekettiń arqasynda birneshe adamnyń ómiri saqtalyp qaldy.
Qutqarylǵan týrıster der kezinde kómek kórsetken azamattarǵa alǵystaryn bildirdi.
Polıtsııa óńir turǵyndary men qonaqtaryna kólde demalý kezinde qaýipsizdik talaptaryn saqtaýdy, aýa raıy boljamyn eskerýdi jáne mindetti túrde qutqarý keýdeshelerin paıdalanýdy eskertti.
Aıta keteıik, buǵan deıin Kaspıı teńizinde eki adam qutqaryldy.
