Alakólde múgedek balalarǵa arnalǵan saýyqtyrý lageri ashylady

ÓSKEMEN. QazAqparat - Shyǵys Qazaqstan oblysynyń bilim basqarmasy Alakól jaǵalaýynda múmkindigi shekteýli balalarǵa arnap jazǵy saýyqtyrý lagerin ashpaqshy. Bul týraly oblys ákimdiginde ótken jıynda aıtyldy, dep habarlaıdy QazAqparat tilshisi.

Oblystyq bilimi berý basqarmasynyń basshysy Saırangúl Jumadilovanyń aıtýynsha, Alakóldiń jaǵasynan salynatyn lager bir jolda 220 balany qabyldaýǵa qaıqarly. Onda erekshe kútimge zárý balalar densaýlyqtaryn nyǵaıtyp qana qoımaı, bos ýaqyttaryn oıyn-saýyqpen ótkizýge múmkindik alatyn bolady.

«Jabyq haýyz, oıyn alańdary, emdik jattyǵý zaly, kınozal, kitaphana, fızıokabınet, «tuzdy shahta», «logoped beketi», amfıteatr sııaqty paıdaly nysandar múmkindigi sheýteýli balalardyń ýaqytty tıimdi ótkizýine qyzmet etetin bolady» - deıdi Saırangúl Jumadilova.

Bul nysanǵa Úrjar aýdanyndaǵy ІІM -ge qarasty shıpajaı ǵımaraty berilýi múmkin.

«Qaıtalap saraptama júrgizý qajet. Qajet bolsa, ІІM-ge qarasty bolǵan shıpajaıdy jóndeımiz. Budan bólek Semeı qalasynyń Qaraǵaıly shaǵyn aýdanynda da pansıonat ashý kerek» - deıdi óńir ákimi Danıal Ahmetov.

Jıynda bıyl ShQO oqýshylarynyń 99,5% jazǵy demalysyn paıdaly ótkizýge múmkindik alatyny da aıtyldy. Jazǵy lagerlerden bólek túrli úıirmeler men qoǵamdyq jumystar uıymdastyrylmaq. Al kópbalaly jáne turmysy tómen otbasynda tárbıelenip jatqan 33582 bala jazǵy lagerde tegin tynyǵady. Ol úshin jergilikti bıýdjetten 232 mln teńge bólinip otyr.