Alakólde kater qaǵyp ketken áıel kóz jumdy

SEMEI. KAZINFORM — Abaı oblysyndaǵy Alakólde kater qaqqan 63 jastaǵy áıel adamnyń qaza bolýyna baılanysty qylmystyq is qozǵaldy.

Oqıǵa jaǵalaýdan shamamen 200-250 metr qashyqtyqta bolǵan. Aldyn ala málimet boıynsha, áıel adam qaýipsizdik aımaǵynan asyp, ary qaraı júzip ketken. Sol kezde kele jatqan kater ony baıqamaı qaǵyp ketken. Jaraqattyń aýyrlyǵynan zeınetker oqıǵa ornynda kóz jumdy.

Oblystyq Polıtsııa departamentiniń málimetinshe, kater tizgininde bolǵan azamat ýaqytsha ustaý ızolıatoryna qamaldy. Qazir qajetti sot-medıtsınalyq jáne tehnıkalyq saraptamalar taǵaıyndaldy.

— Sý kóligin basqarý jáne paıdalaný erejeleri buzylýynyń adam ólimine ákep soǵýy faktisi boıynsha Qylmystyq Kodeksiniń tıisti babymen sotqa deıingi tergeý amaldary júrgizilip jatyr. Oqıǵa ornynda ýákiletti organdardyń qyzmetkerleri jumys istep jatyr. Tekserý nátıjeleri boıynsha protsessýaldyq sheshim qabyldanady, — delingen aqparatta.

Eske salsaq, osyǵan deıin ShQO-da qaıyqtan qulap ketken adamnyń denesi tabylǵany habarlanǵan.