Alakólde er adam sýǵa batyp ketti
ÓSKEMEN. QazAqparat – Shyǵys Qazaqstannyń Úrjar aýdanynda bir adam Alakólge batyp ketti, dep habarlaıdy QazAqparat.
ShQO Tótenshe jaǵdaılar departamentiniń habarlaýynsha, 56 jastaǵy er adam Alakóldiń shomylýǵa arnalmaǵan tusynan sýǵa túsken.
«Qaıǵyly oqıǵa bolǵan jaǵalaýda shomylýǵa tyıym salatyn belgi ornatylǵan. Soǵan qaramastan, er adam sýǵa túsken. Oqys oqıǵa týraly jergilikti ýchaskelik polıtsııa ınspektory habarlady. Súńgýirler bir saǵat boıy izdep, jaǵadan 30 metr qashyqtyqta 15 metr tereńdikten sýǵa ketken adamnyń denesin tapty», - delingen departamenttiń aqparatynda.
Tótenshe jaǵdaı ókilderi demalys kúni Semeı qalasynda da osyǵan uqsas jaǵdaı bolǵanyn aıtady.
«Ertis ózenindegi shyǵanaqta 47 jastaǵy er adamnyń máıiti tabyldy. Kýágerlerdiń aıtýynsha, marqum ózenniń ortasyna deıin júzip baryp, qaıta almaı qalǵan. Eki jaǵdaıda da sýǵa ketken adamdar mas bolǵan», - delingen departamenttiń baspasóz qyzmetiniń málimetinde.
Shomylý maýsymy bastalǵannan beri oblysta 24 adam sýǵa ketken.
